Interamnicos

Os interamnicos^[1] (en latín: Interamici), ás veces citados como interamicos (latín: interamici), foron un pobo prerromano da antiga Gallaecia, que segundo as fontes estaban inclusos no Convento xurídico bracarense.

Interamnicos
Instancia de	grupo étnico histórico e tribo
Grupo	galaicos
Localización
Países Roma Antiga
Rexión histórica	Hispania
Provincia romana	Gallaecia
Convento xurídico	Convento Bracarense
[ Wikidata ]

Fontes

Os interamnicos aparecen citado por Tolomeo II, 6, 28, e nalgunhas inscricións epigráficas, das que sen dúbida a máis importante é o Padrón dos pobos, na que son listados entre outros grupos que seguramente axudaran a erguer a ponte romana de Chaves.

Redución xeográfica

A situación deste pobo ten sido obxecto de controversias entre os especialistas na materia. O claro é que son un pobo do convento bracarense. Tranoy (1981) colocounos no Tras-os-Montes portugués, entre os ríos Tuela e Rabaçal.

Mais, xa antes Rodríguez Colmenero (1973) noticiara a propia descuberta dunha epígrafe no que a República dos interamnicos honraba a un Quinto Licinio. Como quer que a lápida fora achada en Asadur, no concello de Maceda, na provincia de Ourense, o autor consideraba que os interamnicos debían ser resituados, nesa zona, que limitarían os ríos Miño e os seus afluentes Sil e Arnoia, o que xustificaría a denominación de interamnicos (interpretábel como "os do entre ríos", de inter "entre" e amnium "río")

Porén, na síntese de Felipe Arias, seguen a colocarse nos Tras-os-Montes, "entre Chaves e Braganza".