CD91

O CD91 (cluster de diferenciación 91) ou proteína 1 relacionada co receptor da lipoproteína de baixa densidade (LRP1, Low density lipoprotein receptor-related protein 1), tamén chamada receptor de alfa-2-macroglobulina (A2MR), ou receptor de apolipoproteína E (APOER), é unha proteína da superficie celular de certas células, que forma un receptor implicado na endocitose mediada por receptor. Nos humanos está codificado no xene LRP1 do cromosoma 12.^[1][2]

Modelo da LRP1 (baseado en PDB 1cr8).

Características

A LRP1 sinteízase como un precursor longo glicoproteico, que é procesado na rede trans-Golgi polo encima furina, xerando unha subunidade alfa e outra beta máis pequena de 85 kDa, que permanecen ligadas non covalentemente durante o seu transporte á membrana plasmática. A fosforilación da cola da LRP1 regula a introdución do ligando na célula e a transdución de sinais.^[3]

Función

A LRP1 está implicada en varios procesos celulares, como a sinalización intracelular, homeostase lipídica, e eliminación de células apoptóticas.

LRP1 e a enfermidade de Alzheimer

As neuronas precisan colesterol para funcionar. O colesterol é importado ao interior da neurona pola apolipoproteína E (apoE) por medio de receptores LRP1 da superficie celular. A expresión do receptor de lipoproteínas LRP1 regula os niveis de apoE e colesterol no sistema nervioso central. A clivaxe feita polo encima gamma-secretase da proteína precursora amiloide é importante na regulación do metabolismo da apoE e do colesterol a través do LRP1, o que establece unha vinculación entre a proteína precursora amiloide e a apoE, que son os dous maiores determinantes do Alzheimer.^[4]

Algúns estudos atoparon que o LRP media a endocitose e degradación da proteína precursora amiloide segregada^[5]. Outros estudos indican que a alfa-2 macroglobulina (A2M), por medio do LRP, media a eliminación do amiloide beta xerado pola proteína precursora amiloide, que é o principal compoñente das placas amiloides na enfermidade de Alzheimer.^[6]

Interaccións

O LRP1 ou CD91 interacciona con: apolipoproteína E,^[7][8] lipoproteína lipase,^[9][10][11] receptor de uroquinase,^[12] MAPK8IP2,^[13] activador do plasminóxeno dos tecidos,^[14][15] trombospondina 1,^[16][17][18] SYNJ2BP,^[13] DLG4,^[13] NOS1AP,^[13] calreticulina,^[19] APBB1,^[20] ITGB1BP1,^[13] MAPK8IP1,^[13] GIPC1^[13] e SHC1.^[21][22]