Microchirus ocellatus

Microchirus ocellatusa, (Linnaeus, 1758) é unha especie de peixe teleósteo da orde dos pleuronectiformes, suborde dos pleuronectoideos e familia dos soleidos,^[1] coñecida en galego como acedía de ollos.^[2]

Para outras páxinas con títulos homónimos véxase: Acedía (homónimos).

Microchirus ocellatus Acedía de ollos
Clasificación científica
Reino: Animalia Filo: Chordata Subfilo: Vertebrata Clase: Actinopterygii Subclase: Neopterygii Infraclase: Teleostei Superorde: Acanthopterygii Orde: Pleuronectiformes Suborde: Pleuronectoidei Familia: Soleidae Xénero: Microchirus Especie: M. ocellatus
Nome binomial
Microchirus ocellatus (Linnaeus, 1758)

Trátase dun pequeno linguado, de até 20 cm de lonxitude como máximo (de aí o nome vulgar de acedía), que habita en fondos mariños areosos ou lamacentos, entre os 20 e os 300 m de profundidade, no Atlántico centro oriental (incluído o Mediterráneo), desde o suroeste da Península Ibérica até Serra Leoa, e en Suráfrica e no Índico occidental.

Taxonomía

Descrición

A especie foi descrita por primeira vez en 1758 polo naturalista sueco Carl von Linné (Linneo), na 10ª edición do seu Systema Naturae, baixo o nome de Pleuronectes ocellatus.

Sinónimos

Ao longo do tempo foi coñecida, ademais de polo nome orixinario de Linneo e polo actualmente válido, polos sinónimos seguintes:^[1]

• Echinosolea oculata (Risso, 1827)
• Microchirus (Microchirus) ocellatus (Linnaeus, 1758)
• Monochirus ocellatus (Linnaeus, 1758)
• Monochirus quadriocellatus (von Bonde, 1922)
• Quenselia ocellata (Linnaeus, 1758)
• Solea ocellata (Linnaeus, 1758)
• Solea oculata Risso, 1827
• Solea quadriocellata von Bonde, 1922

Etimoloxía

O nome específico, ocellatus, é a forma masculina do nominativo do adxectivo latino ocellātus, -a, -um, "que ten ollos pequenos", aludindo aos catro ocelos que presenta no lado pigmentado.

Características

• É moi semellante, na forma do corpo, ao linguado común do que se diferencia, ademais de polo seu tamaño moito menor, sobre todo pola súa característica librea do lado pigmentado.
• A coloración xeral deste lado é parda, e na parte anterior presenta algunhas manchas escuras de forma indefinida e, na posterior, catro ocelos de cor azulada e rodeados dunha liña amarela.
• As aletas dorsal e anal son de cor negra ou escura coas marxea brancas.
• A columna vertebral está constituída por de 40 a 43 vértebras.
• A aleta dorsal está sustentada por de 62 a 70 raios; e a anal, por de 64 a 75 raios.^[3][4]
• O seu tamaño máximo é de 20 cm, aínda que os espécimes capturados roldan tan só os 15 cm.^[3]

Hábitat e distribución

É unha especie mariña, demersal, oceanódroma que habita en mares subtropicais, en fondos de entre os 30 e os 300 m de profundidade,^[4] entre os 43° N e os 4° N,^[5], no Atlántico centro-oriental, encontrándose nas costas do suroeste da Península Ibérica, o mar Mediterráneo, a illa de Madeira, as illas Canarias, Senegal, Ghana, Guinea-Bissau e Serra Leoa, e nas do océano Índico occidental, desde a antiga provincia de Natal (Suráfrica), até as costas occidentais da India.^[5]

Pesca

Microchirus ocellatus é obxecto de pesca nas zonas 27, 34 e 37 (nordeste do Atlántico, Atlántico centro-leste e Mediterráneo e mar Negro, respectivamente).^[2]