Miópsidos

A dos miópsidos (Myopsida) é unha orde de moluscos cefalópodos da superorde dos decapodiformes,^[2] ou decápodos, que constitúe, co seu grupo irmán, o dos egópsidos (Oegopsida), os cefalópodos coñecidos na bibliografía internacional como "luras".

Miópsidos Myopsida
Loligo forbesi, chamado lula en Sada.[1]
Clasificación científica
Reino: Animalia Subreino: Eumetazoa (sen clasif.) Bilateria Filo: Mollusca Clase: Cephalopoda Subclase: Coleoidea Superorde: Decapodiformes Orde: Myopsida d'Orbigny, 1841 [2]
Familias
Vexase o texto

Loligo vulgaris, a lura común.

Características

Estas luras caracterízanse, entre outras cousas por teren as súas femias un só oviduto (o esquerdo) e non duplo, como os egópsidos, pero principalmente por teren a cámara anterior do ollo pechada ao exterior, ou en comunicación co el a través dunha pequena abertura, situada lateralmente, nunha segunda membrana (ademais da córnea).^[3]

Taxonomía

Descrición

A orde foi descrita en 1841 polo naturalista francés Alcide d'Orbigny.

Etimoloxía

O termo Myopsida está formado polos elementos do latín científico my-, tirado do grego antigo μύω, mýo, 'pecharse', especialmente os ollos, e -opsida, derivado do grego antigo ὅψις ópsis, 'ollo'. Literalmente: 'os de ollos pechados', aludindo a que non teñen burato na córnea dos ollos (como os egópsidos).

Clasificación

Segundo o World Register of Marine Species, a orde comprende tan só as dúas familias seguintes:^[2]

• Australiteuthidae C. C. Lu, 2005 - con tan só un xénero monospecífico, Australiteuthis.^[4]
• Loliginidae Lesueur, 1821 - con once xéneros,^[5] dos que o máis coñecido é Loligo.

Algúns autores substitúen este taxon pola suborde dos miopsinos (Myopsina), dentro da orde dos téutidos (Teuthida).