Pseudomonadales

Pseudomonadales é unha orde de proteobacterias. Comprende especies quimiorganótrofas e xeralmente móbiles por flaxelos. Como todas as proteobacterias son bacterias gramnegativas. Os xéneros Azomonas e Azotobacter son bacterias fixadoras do nitróxeno de vida libre que pertencen a este grupo. Especies do xénero Pseudomonas son patóxenas de plantas, seres humanos e animais. Moraxella e Acinetobacter poden ser tamén patóxenas.

Pseudomonadales
Pseudomonas aeruginosa
Clasificación científica
Dominio: Bacteria Filo: Proteobacteria Clase: Gammaproteobacteria Orde: Pseudomonadales Orla-Jensen, 1921
Familias
Moraxellaceae Pseudomonadaceae Propostas pero controvertidas: Azotobacteraceae Branhamaceae

Sistemática

Na subdivisión en familias das Pseudomonadales non hai un total acordo. A orde subdivídese nas familias Pseudomonadaceae e Moraxellaceae.^[1] Nalgunhas clasificacións colócase nesta orde unha terceira familia, as Azotobacteraceae, pero é controvertido, xa que outros asocian os xéneros Azotobacter e Azomonas coas Pseudomonadaceae, nas que formarían, xunto con Azorhizophilus, o grupo Azotobacter. De feito, análises recentes do xenoma non anotado de Azotobacter vinelandii indican que é máis apropiado agrupar esta bacteria coas da familia Pseudomonadaceae.^[2] Tamén se propuxo a familia Branhamaceae, na que se acomodarían os xéneros Moraxella e Branhamella (pero hai sinonimias entre eses dous xéneros, polo que non parece apropiado).^[3]

A seguinte é unha lista de familias e xéneros:^[4]:

• Moraxellaceae Rossau et al. 1991:
  • Acinetobacter Brisou e Prévot 1954
  • Alkanindiges Bogan et al. 2003
  • Enhydrobacter Staley et al. 1987
  • Moraxella Lwoff 1939
    • Moraxella catarrhalis (Frosch e Kolle1896) Henriksen e Bøvre 1968
      Syn. Branhamella catarrhalis (Frosch e Kolle 1896) Catlin 1970^[5]
  • Perlucidibaca Song et al. 2008
  • Psychrobacter Juni e Heym 1986
• Pseudomonadaceae Winslow et al. 1917
  • Azomonas Winogradsky 1938
  • Azorhizophilus Thompson & Skerman 1981
  • Azotobacter Beijerinck 1901
  • Cellvibrio (Winogradsky 1929) Blackall et al. 1986
  • Mesophilobacter Nishimura et al. 1989
  • Pseudomonas Migula 1894
  • Rhizobacter Goto & Kuwata 1988
  • Rugamonas Austin & Moss 1987
  • Serpens Goto & Kuwata 1988