Suzanne Duchamp

Suzanne Duchamp, nada o 20 de outubro de 1889 en Blainville-Crevon (Normandía) e finada o 11 de setembro de 1963 en Neuilly-sur-Seine, foi unha pintora dadaísta francesa.

Suzanne Duchamp

Biografía
Nacemento	20 de outubro de 1889 Blainville-Crevon, Francia
Morte	11 de setembro de 1963 (73 anos) París, Francia
Lugar de sepultura	cemiterio monumental de Ruán
Educación	École supérieure d'art et design Le Havre-Rouen
Actividade
Campo de traballo	Pintura
Ocupación	pintora
Movemento	Dadaísmo
Participou en
31 de outubro de 1903	Salón de Outono
	Salón dos Independentes
Obra
Arquivos en	Biblioteca Kandinsky [ DUC]
Familia
Cónxuxe	Jean Crotti
Pais	Justin-Isidore Eugène Duchamp   e Lucie Duchamp
Irmáns	Raymond Duchamp-Villon Jacques Villon Marcel Duchamp

Traxectoria

Suzanne Duchamp foi a cuarta de seis fillos, dunha familia adiñeirada con temperamento artístico. O seu avó materno era o pintor Émile Frédéric Nicolle. Suzanne era irmá máis nova de:

• Jacques Duchamp, coñecido como Jacques Villon (1875-1963), pintor e gravador
• Raymond Duchamp, coñecido como Raymond Duchamp-Villon (1876-1918), escultor
• Marcel Duchamp (1887-1968), pintor, escultor, escritor e xadrecista

Con 16 anos entrou na Escola de Belas Artes de Rouen. As súas primeiras obras eran de inspiración impresionista e cubista. Casou en 1919, con 21 anos, co pintor Jean-Joseph Crotti, a quen influíu considerabelmente, mais logo divorciáronse. Trasladouse entón ao barrio parisiense de Montparnasse para estar máis preto do seu irmán Marcel e desenvolver a súa carreira artística.

Malia as dificultades que tiñan as mulleres pintoras para obteren pleno recoñecemento, a fama artística dos seus irmáns máis vellos permitiulle realizar a súa primeira grande exposición aos 22 anos no parisiense Salón dos Independentes. Máis adiante participou no Salon des Tuilleries, no Salón de Outono e na Unión de Mulleres Pintoras e Escultoras. Tamén fixo varias exposicións individuais na Galerie Paul Guillaume (1922), na Galerie René Zivy (1928) e na Galerie Le Portique (1929).^[1]

Durante a Primeira guerra mundial traballou como enfermeira en París. A primeira das súas obras dadaístas, Multiplication brisée et rétablie (Multiplicación rota e restaurada) apareceu despois da guerra, rematada en 1919.

En 1967, o seu irmán Marcel axudouna a preparar unha exposición en Ruán titulada Les Duchamp: Jacques Villon, Raymond Duchamp-Villon, Marcel Duchamp, Suzanne Duchamp. Parte desta exposición familiar foi presentada no Museo Nacional de Arte Moderna do Centro Georges Pompidou de París.