Tigre de Bengala

O tigre de Bengala (Panthera tigris tigris) é a subespecie de tigre máis numerosa de Asia. A súa poboación estimouse en menos de 2 500 exemplares no ano 2011. Dende 2008, está clasificado como "en perigo" segundo a Lista Vermella da IUCN e está ameazado pola caza furtiva, destrución e fragmentación do seu hábitat. Ningunha das Zonas de Conservación do Tigre está considerada grande de abondo para manter unha poboación efectiva de máis de 250 exemplares adultos.^[1]

Tigre de Bengala
Estado de conservación
En perigo[1][2]
Clasificación científica
Reino: Animalia Filo: Chordata Clase: Mammalia Orde: Carnivora Familia: Felidae Xénero: Panthera Especie: P. tigris Subespecie: P. t. tigris Linnaeus, 1758
Sinonimia
P. t. fluviatilis P. t. montanus P. t. regalis P. t. striatus

O tigre chegou ó subcontinente indio hai uns 12 000 anos.^[3] A poboación de tigre na India estimouse en 1 706–1 909 exemplares en 2010.^[4] En 2014, a poboación recuperouse levemente chegando a 2 226 exemplare.^[5] Estímase que hai uns 440 tigres en Bangladesh, 163–253 no Nepal e 103 en Bután.^[6][7][8][9]

O tigre de Bengala está entre os meirandes félidos vivos.^[10][11] Por iso está considerado como parte da megafauna carismática do mundo.^[12] É o animal nacional da India e de Bangladesh.^[13]