Traza

Traza, couza, caruncho, trilla, corta ou rela son as denominacións populares dadas a diferentes grupos de insectos que se alimentan dos tecidos, a madeira ou o papel, segundo os casos.^[1] Con este nome coñécense en galego dous grupos de insectos moi distintos:

• Traza da roupa: son larvas de certos lepidópteros que se alimentan dos tecidos da roupa.
• Traza da madeira: son larvas de certos coleópteros, que se alimentan de madeira.

Para outras páxinas con títulos homónimos véxase: Traza (álxebra linear).

Para outras páxinas con títulos homónimos véxase: Rela (homónimos) e Caruncho.

Larva de Tineola bisselliella (unha traza da roupa).

Adulto de Tineola bisselliella (unha traza da roupa).

Anobium punctatum (unha traza da madeira) a piques de saír do seu burato.

Larva dunha traza da madeira extraída dun tronco.

Traza da roupa

As trazas que atacan a roupa (principalmente de la, pero tamén doutras fibras) e pezas de pel son larvas (eirugas) de certos lepidópteros, principalmente da familia Tineidae. As especies máis difundidas son Tineola bisselliella, Tinea pellionella e Trichophaga tapetzella. Os adultos son unhas avelaíñas voadoras inofensivas, pero reprodutoras, que se orixinaron pola metamorfose das larvas; só as larvas son directamente nocivas. Estas trazas pertencen ao gran grupo de lepidópteros dos heteróceros (as avelaíñas), pero a gran maioría das avelaíñas non se alimentan de roupa.

Traza da madeira

As trazas que atacan a madeira de mobles, construcións de madeira e troncos son as larvas de certas especies de coleópteros (escaravellos), principalmente da familia Anobiidae, pero tamén doutras familias. Constrúen túneles na madeira producindo os danos e xerando un característico po ou serraduras. Cando a larva sofre a metamorfose, convértese en adulto voador, que sae ao exterior, pon os ovos e vive pouco tempo (uns días).

Algunhas especies destrutivas son:

• Diversas especies de Platypodidae
• Diversas especies de Scolytidae
• Ernobius mollis (Anobiidae)
• Anobium punctatum (Anobiidae)
• Xestobium rufovillosum (Anobiidae)
• Hylotrupes bajulus (Cerambycidae)
• Lyctus brunneus (Bostrichidae, subfamilia Lyctinae)
• Pentarthrum huttoni (Curculionidae)