Trichodesmium

Trichodesmium é un xénero de cianobacterias filamentosas, planctónicas e coloniais. Teñen poboacións estables e xeran floracións visibles en rexións oceánicas tropicais e subtropicais, pobres en nutrientes, do Atlántico, o Pacífico e o Índico. Thricodesmium son diazótrofos: fixadores de nitróxeno atmosférico (N
2). Son quen de realizar a fixación en condicións de luz diúrna e en condicións aerobias sen precisar de heterocistes ^[1].

Trichodesmium
Clasificación científica
Reino: Bacteria Filo: Cyanobacteria Clase: Cyanophyceae Orde: Oscillatoriales Familia: Microcoleaceae Xénero: Trichodesmium
Especies
T. contortum T. erythraeum T. hildebrandtii T. tenue T. thiebautii T. radians

Trichodesmium pode vivir só ou formando colonias, visibles a simple vista. As colonias que forman xeran o substrato pseudobentónico doutros grupos de microorganismos, como bacterias, diatomeas, dinoflaxelados, protozoos e copépodos. Os copépodos son os principais predadores de Trichodesmium. É un xénero totalmente fotoautótrofo e que é determinante nos ciclos bioxeoquímicos globais xa que fixa entre 60-80 Tg de N anuais, entre unha terza e a metade do nitróxeno fixado no planeta ^[2].

Especies

Trichodesmium erythraeum – descrita por Ehrenberg in 1830 ^[3] T. erythraeum é o axente principal que descolora o Mar Vermello durante as floracións. É o único secuenciado ao completo (denomínase como Trichodesmium IMS 101).

Trichodesmium thiebautii – descrita por Gomont in 1892 ^[4].

Trichodesmium hildebrantii – descrita por Gomont in 1892 ^[4].

Trichodesmium contortum – descrita por Wille in 1904 ^[5].

Trichodesmium tenue – descrita por Wille in 1904 ^[5].

Trichodesmium radians – descrita por Wille in 1904^[5].

Análises filoxenéticas establecen que existen dous clados do xénero: (i) T. tenue e T. erythraeum e (ii) T. thiebautii, T. hildebrandtii e T. contortum. Estudos co xene de referencia nifH mostraron que Trichodesmium spp. e os membros do xénero Katagnymene (K. pelagica e K. spirali) de cianobacterias están moi próximos, malia que ocupan nichos ben diferenciados ^[2].