Hip hop
pupoty ha purahéi / From Wikipedia, the free encyclopedia
Hip hop[1][2] térã rap ha'e pupoty heñói va'ekue Amérika Retãvorekuéra Joajúpe umi tapichakuéra pirehũva apytépe[3] oikóva tavapýpe hérava Bronx amo Táva Nueva York-pe arykuéra 1970 javeve. Ojejapo purysýi jojávagui (ritmo) jepivénte oñembojehe'áva rrapéo purahéi reheve, ha'éva oñemongetávo opurahéi ha osegi aja purysýi jojávare.[4] Ko pupoty ou upe ojeheróva hip hop arandupýgui, ojejapóva irundy mba'égui ha'éva: rrapéo, DJ/scratching (mba'epujere mbopuha oiporúva), break dance (jeroky) ha graffiti (ta'anga ha jehai ojejapóva ogykére).[5][6][7]
Ko pupoty oñepyrũ arykuéra 1970 jave, oñemoherakuãvévo umi arete ha vy'aha guasu ojejapóva tavapýpe Nueva York-pe, tuichaitépe tapichakuéra pirehũva apytépe oiko va'ekue Bronx-pe. Umi vy'ahápe, DJ kuéra ombopu purahéi ojeikuaaitéva oiporúvo mokõi mba'epujere mbopuha ha peteĩ purahéi jehe'aha, upéicha ikatu hikuái ombojehe'a oipotaháicha mokõi purahéi.[8] Ary 1979 javénte oguahẽ ko pupoty ta'angambyry ha puhoépe, heta ohechagíva hese ha ndohechakuaái ichupe peteĩ pupoty teéva ramo.[9]
Arykuéra 1980 ha 1990 pahápe tuichaiterei ojeikuaa oparupi ko pupoty ha herakuãve ohóvo, oñepyrũ avei ojehecha oñembojehe'aha ambue pupoty rehe ha'éva neo soul, nu metal ha R&B. Jepivénte hip hop puraheikuéra omombe'u ijapohára rekove, rembipota ha rekoha rembiasa'asy. Trap ha mumble rap ha'e pupoty heñói va'ekue hip hop-gui ha ko'ãga oñehenduite oparupi avei.