Serbski institut

Serbski institut z.t. je zwonkauniwersitna slědźerska institucija, kotraž so 1992 zhromadnje wot Swobodneho stata Sakska a Kraja Braniborska załoži a so hłownje přez Załožbu za serbski lud spěchuje. Po wustawkach wobsteji jeho nadawk w přeslědźenju a hajenju serbskeje rěče, stawiznow a kultury Serbow Hornjeje a Delnjeje Łužicy w přitomnosći a zašłosći kaž tež w zběranju a archiwěrowanju za to trěbnych materialijow. Dźěło instituta wobsahuje tohorunja komparatistiske slědźenje na polu mjeńšinow w Europje. Serbski institut je po prawniskej formje zapisane towarstwo, kotrež Hauke Bartels jako direktor nawjeduje.

wjednistwo

čas	mjeno
1951–1977	Pawoł Nowotny
1977–1990	Měrćin Kasper
1990–1992	Helmut Faska
1992–2014	Dietrich Šołta
2015–2016	Hauke Bartels a Dietrich Šołta[A 1]
2016	Hauke Bartels (interimny direktor)
2018	Hauke Bartels

Sydło Serbskeho instituta na Dwórnišćowej w Budyšinje

Serbski institut ma sydło na Dwórnišćowej w Budyšinje a wudźeržuje delnjołužisku wotnožku na Bebelowej w Choćebuzu. Wón je wudawaćel sorabistiskeho a kulturnowědomostneho časopisa Lětopis a rjadu monografijow Spisy Serbskeho instituta, kotrejž w Ludowym nakładnistwje Domowina wuchadźataj. Přirjadowanej stej institutej Serbska centralna biblioteka a Serbski kulturny archiw. Institucija so prawidłownje wot wědomostneje, mjezynarodnje wobsadźeneje, přirady a druhich ekspertow ewaluěruje.

Stawizny

W slědźerskim wusměrjenju nawjaza Serbski institut na tradiciju Instituta za serbski ludospyt. Tutón so 1. meje 1951 pod wjednistwom Pawoła Nowotneho w Budyšinje załoži a bě wot 1. awgusta 1952 Němskej akademiji wědomosćow w Berlinje (wot 1972 Akademija wědomosćow NDR) přirjadowany.

Wotkazaj

• Webstrona Serbskeho instituta
• Spisy Serbskeho instituta

Přispomnjenje

1. Direktor běše Dietrich Šołta a jednaćelski zastupjer Hauke Bartels.

51.1753614.42885