Trjebin

**Trjebin**
němsce	Trebendorf
	Trjebin na karće Sakskeje
	Trjebin na karće Sakskeje
Zakładne daty
stat	Němska
zwjazkowy kraj	Sakska
wokrjes	Zhorjelski
wysokosć	126 metrow n.m.hł.
přestrjeń	32,05 km²
wobydlerstwo	709 (31. dec 2023)
hustosć zasydlenja	22 wob. na km²
póstowe čisło	02959
předwólba	(+49) 035773
awtowa značka	GR, LÖB, NOL, NY, WSW, ZI
Politika a zarjadnistwo
wjesnjanosta	Waldemar Locke (CDU)
adresa	Měrowa 83; 02959 Slepo
webstrona	trebendorf.de
Połoženje Trjebina w Sakskej
	Karta
	wikidata: Trjebin (Q544870)

Trjebin (němsce Trebendorf) je wjes we wuchodosakskim Zhorjelskim wokrjesu w sewjerowuchodnym dźělu Hornjeje Łužicy.

Zakładne fakty Zakładne daty, Politika a zarjadnistwo ...

Začinić

51.52638888888914.561111111111

Ke gmejnje słušatej wjesce Trjebin a Miłoraz kaž tež sydlišća Zagora (Hinterberg) a Trjebink (Klein Trebendorf). Gmejna Trjebin słuša do teritorija Slepjanskeje narěče a je dźěl serbskeho sydlenskeho ruma.

Wot cyłkownje něhdźe 850 wobydlerjow bydla 660 w Trjebinje samym a zbytk w Miłorazu.

Trjebin nadeńdźe so někak pjeć kilometrow sewjerozapadnje Běłeje Wody a tři kilometry juhowuchodnje Slepoho při Struze w zapadnym dźělu Mužakowskeje hole. Južny dźěl gmejnskeho teritorija – mjez druhim tež gmejnski dźěl Miłoraz a sydlišćo Zagora – leži we wotbagrowanskim pasmje Wochožanskeje brunicoweje jamy. Sewjernje Trjebin leži Brězowski jězor, woblubowany kupanski jězor.

Susodne gmejny su Slepo a Dźěwin na sewjeru, Běła Woda na wuchodźe a juhu kaž tež Sprjewiny Doł (wokrjes Budyšin) na zapadźe.

Prěnje historiske naspomnjenje jako Trebindorf pochadźa z lěta 1382. Druhdy mjenowaše so po serbskim přikładźe tež jenož Dreben resp. Treben abo tež Dorff Treben. Ležownostne knjejstwo měješe přez lětstotki Mužakowske stawowe knjejstwo.^[2]

W lěće 1999 bu wjes Miłoraz zagmejnowana do Trjebinskeje gmejny.

Wobydlerstwo

Po Mukowej statistice z lětow 1884/85 rěčachu tehdy 375 wot cyłkownje 385 Trjebinjanow serbsce.^[3] Arnošt Černik zwěsći w lěće 1956 we wsy přeco hišće serbskorěčny podźěl wobydlerstwa wot 76,8 %.^[4] Wobydlerjo přisłušachu ze starodawna Slepjanskej wosadźe.

Nazymu 1945 załožichu Trjebinjenjo pod nawodom Mateja Pawla swójsku Domowinsku skupinu.

Gmejna słuša k sakskemu wólbnemu wokrjesej 57 (Zhorjelc 1) a k zwjazkowemu wólbnemu wokrjesej 157 (Zhorjelc).

Matej Berton (1873–1952) – twarski předewzaćel a narodny prócowar
Křesćan Černik (1877–1934) – ratar a ludowy herc

[1]
Aktualne ličby wobydlerstwa po gmejnach 2023; Statistiski krajny zarjad Sakskeje
[2]
Trebin w Digitalnym stawizniskim zapisu městnow Sakskeje (němsce)
[3]
Ernst Tschernik: Die Entwicklung der sorbischen Bevölkerung. Akademie-Verlag, Berlin 1954. → wšě wjeski
[4]
Ludwig Elle: Sprachenpolitik in der Lausitz. Ludowe nakładnistwo Domowina, Budyšin 1995, str. 255. [745 wobydlerjow, z nich 421 dorosćenych z aktiwnymi znajomosćemi serbšćiny, 11 z pasiwnymi, 140 serbskich dźěći a młodostnych, 173 bjez znajomosćow] → wšě wjeski