Richard Andree

Richard Andree (* 26. februara 1835 w Brunšwiku; † 22. junija 1912 w Mnichowje) bě němski geograf a etnograf.

Richard Andree.

Žiwjenje

Richard Andree studowaše w Brunšwiku a Lipsku přirodowědy, wosebje geologiju. W Lipsku zastupi 1857 do tamnišeho studentskeho korpsa Lusatia,^[1] kotryž so 1807 załoži. Studentski korps spožči jemu pozdźišo tež čestne sobustawstwo. Kaž tež hižo jeho nan Karl Andree (1808–1875) slědźi Andree hłownje na polu geografije, a bu přez jeho etnografiske slědźenja tež daloko znaty.

W lětach 1859 do 1863 bě Andree zastojnik w čěskim hórnistwje w knjejstwje Křivoklát wjercha Maxa Egona von Fürstenberga. W Lipsku, hdźež nawjedowaše mjez 1873 do 1890 kartografiski wustaw nakładnistwa Velhagen & Klasing, zaběra so Andree zdobom z kartografiju a měješe wulki podźěl při wudźěłanju a wudawanju šulskich atlantow a Physikalisch-Statistischen Atlas des Deutschen Reichs. Nimo toho běše redaktor wědomostneho časopisa Globus. Twórby Richarda Andreeja wobwliwowachu tež Arnošta Mukowe slědźenja wo serbskim kulturnym žiwjenju. Wot 1903 bě Andree z ludowědnicu Marie Andree-Eysn (1847–1929) z Awstriskej zmandźeleny. 1886 woli so wón na sobustawa akademije wučenych Leopoldiny a 1909 bu čestny sobustaw Berlinskeje towaršnosće za antropologiju, etnologiju a prastawizny (Berliner Gesellschaft für Anthropologie, Ethnologie und Urgeschichte).

Richard Andree zemrě w běhu jězby z ćahom wot Mnichowa do Nürnberga w starobje 76 lět.

Twórby (wuběr)

• Das Amur-Gebiet und seine Bedeutung: Reisen in Theilen der Mongolei, den angrenzenden Gegenden Ostsibiriens, am Amur und seinen Nebenflüssen. Leipzig 1867 (online z wobstatka uniwersity w Rěznje).
• Wendische Wanderstudien. Zur Kunde der Lausitz und der Sorbenwenden. Stuttgart 1874 (digitalizat)
• Chronik des Corps Lusatia zu Leipzig 1807 bis 1877. Auszug aus den Annalen des Corps, Leipzig 1877.
• Ethnographische Parallelen und Vergleiche. Stuttgart 1878.
• Zur Volkskunde der Juden. Bielefeld und Leipzig 1881.
• Andrees Allgemeiner Handatlas. Leipzig 1881–1937 (dźewjeć wudaćow).
• Die Flutsagen ethnographisch betrachtet. Braunschweig 1891.
• Geschichte des Corps Lusatia zu Leipzig 1807 bis 1898. Leipzig 1898.
• Braunschweiger Volkskunde. Braunschweig 1901.

Wotkazy

•  Commons: Richard Andree – Zběrka wobrazow, widejow a awdiodatajow
• Richard Andree – Literatura w katalogu Němskeje narodneje biblioteki (němsce)
• Serbski institut: Biografien zur sorbischen Volkskunde (Biografije k serbskej ludowědźe) na serbski-institut.de (němsce)
• Droysens Allgemeiner Historischer Handatlas, 1886