Հենրիկ Աբրահամյան

Հենրիկ Մուշեղի Աբրահամյան (հուլիսի 15, 1937(1937-07-15)^[1], Ղափանի շրջան, Հայկական ԽՍՀ, ԽՍՀՄ), հայ պատմաբան, պատմական գիտությունների դոկտոր (1995), պրոֆեսոր (2000):

Հենրիկ Աբրահամյան
Ծնվել է	հուլիսի 15, 1937(1937-07-15)[1] (88 տարեկան)
Ծննդավայր	Ղափանի շրջան, Հայկական ԽՍՀ, ԽՍՀՄ
Քաղաքացիություն	Հայաստան
Կրթություն	Երևանի պետական համալսարան
Գիտական աստիճան	պատմական գիտությունների դոկտոր
Մասնագիտություն	պատմաբան, համալսարանի դասախոս և հեղինակ

Կենսագրություն

Ծնվել է 1937 թվականի հուլիսի 15–ին Կապանի շրջանի Փուխրուտ գյուղում։ 1955 թվականին ավարտել է Ղափանի թիվ 1 միջնակարգ դպրոցը։ 1958–1963 թվականներին սովորել և ավարտել է Երևանի պետական համալսարանի Պատմության ֆակուլտետը։ 1964–1965 թվականներին աշխատել է Ղափանի շրջանում որպես Շրջկոմի առաջին քարտուղար։ 1968 թվականին ընդունվել է ԵՊՀ Պատմության ֆակուլտետի ասպիրանտուրա։ 1969–1973 թվականներին աշխատել է ԵՊՀ ԽՄԿԿ Պատմության ամբիոնի ասիստենտ, 1973-1978 թվականներին ` ավագ դասախոս, 1978–1991 թվականներին` ամբիոնի դոցենտ։ 1973 թվականին պաշտպանել է թեկնածուական ատենախոսություն «Հայաստանի Կոմկուսի գործունեությունը բանվոր դասակարգի կուլտուր-տեխնիկական մակարդակի բարձրացման ուղղությամբ» թեմայով։ 1991–2000 թվականներին Հենրիկ Աբրահամյանը եղել է Հայաստանում նոր ձևավորված ԵՊՀ Պատմության ֆակուլտետի Հայաստանի հարակից երկրների պատմության ամբիոնի դոցենտ։ 1994–2000 թվականներին միաժամանակ եղել է ԵՊՀ Պատմության ֆակուլտետի դեկանի տեղակալ։ 1995 թվականին պաշտպանել է դոկտորական ատենախոսություն։ 1995–1996 թվականներին եղել է ԵՊՀ Պատմության ֆակուլտետի դեկանի պաշտոնակատար։ 2000–2007 թվականներին եղել է ԵՊՀ Պատմության ֆակուլտետի Հայաստանի հարակից երկրների պատմության ամբիոնի վարիչ։ 2007 թվականից որպես պրոֆեսոր աշխատում է ԵՊՀ Պատմության ֆակուլտետի Հայաստանի հարակից երկրների պատմության ամբիոնում։ Հենրիկ Աբրահամյանը մասնակցել է մի շարք հանրապետական և միջազգային գիտաժողովների և հանդես եկել զեկուցումներով (Սվերդլովս), 1984 թվական, Երևան, 1998 թվական, 2003 թվական)։ Հեղինակ է 3 մենագրության, 1 ուսումնական ձեռնարկի, մի շարք բրոշյուրների, ուսումնական ծրագրերի և 40–ից ավելի գիտական հոդվածների։ 2007 թվականին Հենրիկ Աբրահամյանը պարգևատրվել է ԵՊՀ ոսկե հուշամեդալով։

Երկեր

• Հայաստանի Կոմկուսի գործունեությունը բանվոր դասակարգի կուլտուր-տեխնիկական մակարդակի բարձրացման ուղղությամբ, Երևան, 1975:
• Հայաստանի Կոմկուսի գործունեության քննական վերլուծությունը բանվոր դասակարգի կուլտուր-տեխնիկական մակարդակի և ստեղծագործական ակտիվության բարձրացման ուղղությամբ, Երևան, 1990:
• Ժողովրդավարությունը և քաղաքական կուսակցությունները, Երևան, 2009, 112 էջ^[2]
• Խորհրդային և հետխորհրդային հասարակությունը 1945-2011 թվականներին, Երևան, 2011, 122 էջ^[3]

Գրականություն

• Երևանի պետական համալսարանի 90-ամյա պատմության ֆակուլտետը, խմբ. Էդիկ Մինասյան, Երևան, ԵՊՀ, 2009, էջ 177։