Okra

Ti okra ket maysa a agsabsabong a mula iti pamilia a Malvaceae a kasisigud iti tropikal nga Aprika. Dati a maibilbilang kas sebbangan ti Hibiscus, ngem naidasig itan iti henero ti Abelmoschus. Ti balikas nga "okra" ket nagtaud iti Aprikano a pagsasao.

Okra
Ti mula nga okra nga addaan iti nataengan ken agrangrang-ay a bunga
Immatiddog a naiwa nga okra
Taksonomia
Pagarian:	Plantae
Klado:	Tracheophytes
Klado:	Angiospermae
Klado:	Eudicotidae
Klado:	Rosids
Urnos:	Malvales
Pamilia:	Malvaceae
Henero:	Abelmoschus
Sebbangan:	A. esculentus
Dua a nagan
Abelmoschus esculentus (L.) Moench
Sangalubongan a panagpataud iti okra
Kapada a nagan[1]
Abelmoschus bammia Webb abelmoschus longifolius (Willd.) Kostel. Abelmoschus officinalis (DC.) Endl. Abelmoschus praecox Sickenb. Abelmoschus tuberculatus Pal & Singh Hibiscus esculentus L. Hibiscus hispidissimus A.Chev. nom. illeg. Hibiscus longifolius Willd. Hibiscus praecox Forssk.

Naganus a bunga ti okra. Agtarikayo dagitoy no saan mapuros ti mula.

Ti okra ket tinawen a mula wenno patinayon (perenial) a muyong a mula, a dumakkel agingga iti dua a metro a katayag. Ti bungana ket immarantiddog a nagkuntirad, 5 agingga 20 a sentimetro a kaatiddog, nga addaan iti adu a bukbukel.

Maimulmula ti okra kadagiti tropikal ken nabara a depdeppaar iti lubong kas tarao a nateng. Nayallatiw iti Estados Unidos babaen ti komersio ti Aprikano nga adipen, ket mabalin a maimula kadagiti umabagatan nga estado kas tinawen a mula. Maysa met ti okra kadagiti kalatakan a nateng iti naladaw a maika-20 a siglo a panagluto dagiti Hapon. Iti met panagluto a Palestina, iti Jordan ken dadduma pay a paset ti dumaya a Mediteraneo, ti okra ket maar-aramid a napalet a luto a masagpawan iti dadduma pay a natnateng ken karne. Iti Filipinas, nangruna iti Kailokuan, maysa a ramen ti okra iti pinakbet dagiti Ilokano ken gagangay a mailingta wenno maituno ti okra a maensalada wenno maisawsaw iti bugguong.