Astana

Astana (til 1998 konocita kom Ahmola e de 2019 til 2022 kom Nur-Sultan) esas la chef-urbo di Kazakstan pos 1997. Segun statistiki dil yaro 2022 ol havis 1 350 228 habitanti. Lua tota surfaco esas 710,2 km².

Astana
Moskeo e moderna edifici en Astana.
Standardo	Blazono
Lando:	Kazakstan
Informo:
Fondita ye:	8ma yarcento (Bozok) 1830 (moderna urbo)
Latitudo:	51°10' N
Longitudo:	71°25' E
Altitudo:	347 m
Surfaco:	710,2 km²
Habitanti:	1 350 228 (2022)
Denseso di habitantaro:	958 hab./km²
Disto de Almaty:	1204,4[1] km
Horala zono:	UTC+5
Urbestro:	Zhenis Kassymbek
Mapo:
Oficala retosituo:
www.astana.kz

Strado en Astana.

Fondita en 1830 kun la nomo Ahmoli, ol rinomizesis Ahmolinsk en 1832. En 1961 ol rinomizesis Celinograd, ed en 1992 ol rinomizesis Ahmola. Fine, ye la 10ma di decembro 1997, ol rinomizesis Astana, nomo konservita til la 20ma di marto 2019, kande ol recevis la nomo Nur-Sultan homaje l'ex-prezidanto Nursultan Nazarbayev. En 2022 ol itere rinomizesis Astana.

Ol distas 1204 kilometri norde de Almaty. Inter lua simboli esas turmo Baiterek, alta de 105 metri (inkluzite [[anteno), amuzo-centro Khan Shatyr, e moskeo Hazrat Sultan. La Palaco di la Paco e Rikoncilio emfazas l'ideo dil urbo kom centro por dialogo e koopero.

Astana gastigas importanta universitati: Universitato Nazarbayev, Universitato Nacional Euraziana L. N. Gumilev, e l'Universitato pri Informatiko e Teknologio.

Geografio

Satelital imajo pri Astana.

Cirkondata da stepi, la reliefo di Astana esas plata, jacanta an la centro di la lando, alonge rivero Ishim. Lua mezavalora altitudo esas 347 metri super la marala nivelo. Ol distas cirkume 1200 km per choseo del olima chef-urbo, Almaty. Astana subdividesas en quar distrikti.

La klimato dil urbo esas extreme kontinentala (Dfb segun la klimatala klasifikuro da Köppen), kun varma someri ed okazionale kurta tempesti, e longa e koldega vintri. Somera temperaturi kelkafoye atingas 35 °C, kontre ke de la duimo di decembro til la komenco di marto la temperaturi freque falas til −30 o mem −35 °C. La mezavalora temperaturo en julio (somero) esas 20,6°C, kontre ke la mezavalora temperaturo en januaro (vintro) esas -14,5°C. Astana esas la 2ma maxim kolda nacionala chef-urbo de la mondo, dop Ulaanbaatar.

La mezavalora yarala pluvo-quanto esas 337,3 mm, e la maxim pluvoza monato esas julio, kun mezavalore 55,8 mm.