Ekonomio di Laos

Pos interna milito qua duris de 1959 til 1975, Laos adoptis socialista rejimo. En 1986, la lando komencis ekonomiala descentraligo e stimular la kreo di privata entraprezi. La rezulti esis bona: la mezavalora yarala kresko de 1988 til 2008 esis 6%, ecepte dum la periodo de la krizo en Azia, en 1997. De 2008 til 2013, l'ekonomio kreskis plu kam 7% omnayare. En 2011, la lando inauguris sua borso.

Ekonomio di Laos
Pekunio	Kip
Internaciona organizuri	ASEAN, MOK, RCEP, G77
Statistiki [1]
Totala nacionala produkturo (TNP)	US$ 64 173 milioni (2023)
Rango TNP	113ma[2] maxim granda
Kresko di TNP	3,75% (2023)
TNP po persono	US$ 8 400,00 (2023)
TNP segun sektoro	agrokultivo 16,1%, industrio 30,5%, servadi 44% (2023)
Inflaciono	23,1% (2024)
Habitantaro sub la povreso-lineo	18,30% (2018)
Laboro-povo	3 585 000 (2024)
Laboro-povo segun okupo	agrokultivo 73,1%, industrio 6,1%, servadi 20,6%
Chomeso	1,2% (2024)
Komercala parteneri [1]
Exportaci (US$)	9 698 milioni (2023)
Precipua parteneri	Popul-Republiko Chinia 39%, Tailando 34%, Australia 4%, Usa 4%, Kambodja 2% (2023)
Importaci (US$)	8 596 milioni (2023)
Precipua parteneri	Tailando 58%, Popul-Republiko Chinia 36%, Japonia 1%, Singapur 1%, Germania 1% (2023)
Publika financi [1]
Extera debo	9 619 milioni (2023)
Revenuo totala (US$)	2 288 milioni (2022)
Spenso totala (US$)	1 596 milioni (2022)
Noto: Ecepte kande kontree mencionata, valori en ca tabelo esas en Usana dolari

Strada merkato en Luang Phrabang.

Por mantenar la kresko, lua guvernerio ambicionis atingar 3 skopi: diminutar la povreso, expansar l'eduko a la tota pueri, ed anke plubonigar la sistemo di transporto interne la lando. La "vetrino" di ta plubonigo en la sistemo di transporti esas la konstrukto di treno di granda rapideso inter Kunming, en Popul-Republiko Chinia, e Vientiane, signifikanta koloko di 6 miliard dolari. Laos anke havas potencialo por produktar energio hidroelektala e sunala. L'ecesajo di elektro produktita exportacesas a vicina landi. En 20220, elektro ja esis disponebla en 100% de la lando^[1].

Agrokultivo reprezentis 23,7% de la TNP en 2014, ed employis 73,1% de la laboro-povo en 2013. L'ekonomiala kresko diminutis la povreso de 46% en 1992 til 26% en 2010. L'ekonomio anke profitas de direta koloko en aquobarili por produktar elektro en fluvio Mekong, en produktado di kupro, oro e ligno, ed en konstrukto, quankam kelka projeti kritikesas pro ambiental efekti.