Lome

Lome (France: Lomé) esas la chef-urbo e maxim populoza urbo di Togo. Segun la demografiala kontado di 2022, ol havis 1 500 000 habitanti, kontre 837 847 habitanti en 2010. Lua tota surfaco esas 99,14 km². Lua metropolala regiono havis 2 188 376 habitanti ye la sam yaro, kontre 1 477 660 habitanti en 2010.

Lomé
Aeral imajo pri Lomé.
Blazono
Lando:	Togo
Informo:
Latitudo:	6°07′51″N
Longitudo:	1°12′55″E
Altitudo:	10 m
Surfaco:	99.14 km²
Habitanti:	1 500 000 (2022)
Denseso di habitantaro:	15000 hab./km²
Horala zono:	UTC+0
Urbestro:	Aouissi Lodé
Mapo:
Oficala retosituo:
www.togoport.tg

Aeroportuo di Lomé.

Lome esas la centro administrala ed industriala di la lando, inkluzanta refinerio di petrolo. Ol ank esas la precipua portuo di la lando, qua exportacas kafeo, kakao, kopro e palmo-oleo. La westala limiti dil urbo extensas til la frontiero kun Ghana, an vicina urbo Aflao, qua distas poka centi di metri de lua centro.

Tale nomizita "Konvenciono di Lome" esas pakto pri komerco e financala helpo establisita inter Europana Uniono e 71 landi de Afrika, Karibia e Pacifiko. Ol signatesis unesmafoye ye la 28ma di februaro 1975, en Lome. La Centrala Banko di Westal Afrikana Stati (Angle Central Bank of West African States, abreviuro BCEAO) e la Banko Westal Afrikana pri Developo (Angle West African Development Bank - BOAD) havas sua sideyi en Lome.

Geografio

Plajo di Lome.

La reliefo di Lome esas plana, jacanta sur tereno kun poka inklineso apud l'Oceano Atlantiko, kun mezavalora altitudo di 10 metri super la marala nivelo. Pro la poka inklineso dil tereno (4%), l'urbo esas vundebla ad inundadi, nome dum epoki di intensa pluvi. La prezenteso di subtera aqui desfaciligas la drenado di surfacal aqui.

La klimato dil urbo esas tropikala de savano (Aw/As segun la klimatala klasifikuro da Köppen), malgre sua latitudo proxim Equatoro. La proximeso kun l'oceano atenuas kaloro e la temperaturi ne augmentas exajere. La mezavalora temperaturo de februaro til la komenco di aprilo esas 29,6°C, kontre ke la mezavalora temperaturo en agosto (vintro) esas 26,2°C. Kelkafoye, de decembro til februaro o marto, sika vento harmattan suflas de Sahara, e la temperaturi povas falar infre 19°C.

Lome havas du pluvoza sezoni: l'unesma iras de aprilo til julio, e la duesma iras de komenco di septembro til la fino di oktobro. La mezavalora yarala pluvo-quanto esas 830,3 mm, e la maxim pluvoza monato esas junio, kun mezavalore 180,5 mm.