Moroni

Moroni esas chef-urbo e maxim populoza urbo di Komori, havanta 111 326 habitanti en 2016^[1]. Ol ank esas chef-urbo di la mi-autonoma insulo Ngazidja o Granda Komoro, la maxim granda dil arkipelago.

Moroni
La portuo di Moroni en 2008.
Lando:	Komori
Informo:
Latitudo:	11°41'54" S
Longitudo:	43°15'20" E
Altitudo:	29 m
Surfaco:	30 km²
Habitanti:	111 326 (2016)
Denseso di habitantaro:	3 711 hab./km²
Horala zono:	UTC+3
• Moroni

L'urbo fondesis da Araba kolonigiisti, posible dum la 10ma yarcento, ed esis chef-urbo di sultanio qua mantenis komercala relati kun Zanzibar.^[2]

Geografio

Plajo Itsandra.

La reliefo di Moroni esas kolinoza, kun poka arei plana. La mezavalora altitudo esas 29 metri sur la marala nivelo. L'urbo distas 10 kilometri de la kratero dil volkano Karthala, qua esas alta de 2 361 metri ed esas aktiva. En 2005, eventis erupto, e multa habitanti diplasesis. La marobordo dil urbo esas rokoza kun origino volkanala, havanta poka plaji.

La klimato di Moroni esas tropikala pluvoza (Af segun la klimatala klasifikuro da Köppen). L'atmosferala humideso varias de 69% til 79% dum tota yaro, e la temperaturi esas relate nevarianta, de 32°C til 34°C le maxima, e de 14°C til 20°C le minima.

La pluvo-quanto esas bone distributata dum la tota yaro. La mezavalora pluvo-quanto dil urbo esas 2700 milimetri. La maxim pluvoza epoko iras de decembro til julio, ma mem en oktobro, la monato min pluvoza, la pluvo-quanto ne esas infre 90 mm. Pro la lokizo dil arkipelago, cikloni esas frequa.