Olimpiala Ludi en Los Angeles, 1932

L'Olimpiala Ludi en Los Angeles, 1932, od oficale la 10ma Olimpiala Ludi, esis internaciona plursporta konkurso qua eventis en 1932 en Los Angeles, Usa. Lore duesmafoye l'Olimpiala Ludi eventis en Usa, ed unesmafoye en Los Angeles.

L'Olimpiala standardo.

La Ludi komencis ye la 30ma di julio e finis ye la 14ma di agosto 1932. Partoprenis 1.332 atleti (126 mulieri e 1.206 viri) de 37 landi. Esis 116 eventi de 14 sporti.

Nula altra urbo prizentis lua kandidateso por l'eventeyo. Pro la Granda Ekonomiala Depreso di 1929 multa landi ed atleti ne povis pagar la voyajo til Los Angeles. Min kam duimo del atleti qui partoprenabis en Amsterdam partoprenis itere en la konkursi en 1932. Mem lora Usana prezidanto Herbert Hoover decidis ne asistar la Ludi.^[1]

Kelka fakti

Takeichi Nishi kun Uranus.

• Unesmafoye en la historio di la Ludi, Olimpiala Vilajo konstruktesis.
• Estrado por montrar la vinkinta atleti uzesis unesma-foye.
• Fotografo uzesis unesma-foye por determinar la vinkanta atleti en kurado.
• Polona atletino Stanisława Walasiewicz ganis ora medalio por 100-metra kurado. En 1980 kande el mortis, deskovresis ke el esis hermafrodito.
• Finlandan atleto Paavo Nurmi ne povis partoprenar, por ja esar profesionala kuristo.
• Japoniano Takeichi Nishi (Barono Nishi) ganis ora medalio por kavalkado kun lua kavalo Uranus. Pose, ilu mortis en 1945 dum la kombati en Iwo Jima.
• Italiano Romeo Neri ganis tri ora medalii por gimnastiko.
• Kusuo Kitamura, lor evanta 14 yari e 309 dii, ganis l'ora medalio pri 1500-metra natado, til nun la maxi yuna natisto qua ganis ora medalio dum l'Olimpiala Ludi.

Medalii ganita

Partopreninta landi. Blue, landi qui partoprenis unesmafoye.

Australian atleti en 1932.

Yen la listo di landi qui recevis adminime 1 bronza medalio en Los Angeles en 1932.

#	Lando	Ora	Arjenta	Bronza	Entote
1	Usa	41	32	30	103
2	Italia	12	12	12	36
3	Francia	10	5	4	19
4	Suedia	9	5	9	23
5	Japonia	7	7	4	18
6	Hungaria	6	4	5	15
7	Finlando	5	8	12	25
8	Unionita Rejio	4	7	5	16
9	Germania	3	12	5	20
10	Australia	3	1	1	5
11	Arjentinia	3	1	0	4
12	Kanada	2	5	8	15
13	Nederlando	2	5	0	7
14	Polonia	2	1	4	7
15	Sudafrika	2	0	3	5
16	Republiko Irlando	2	0	0	2
17	Chekoslovakia	1	2	1	4
18	Austria	1	1	3	5
19	India	1	0	0	1
20	Dania	0	3	3	6
21	Mexikia	0	2	0	2
22	Latvia	0	1	0	1
22	Nova-Zelando	0	1	0	1
22	Suisia	0	1	0	1
25	Filipini	0	0	3	3
26	Hispania	0	0	1	1
26	Uruguay	0	0	1	1
Totali		116	116	114	346