Orlando, Florida

Orlando esas urbo e sideyo dil komtio Orange, stato Florida, Usa. Segun la demografiala kontado di 2020, ol havis 307 573 habitanti, kontre 238 300 habitanti en 2010. Lua tota surfaco esas 308,41 km², equivalanta a 119,08 mi², de qui 287,10 km² (110,85 mi²) esas lando, e la cetera esas aquo. Lua metropolala regiono havas plua kam 2,94 milion habitanti, esanta la 3ma maxim populoza di Florida e la 20ma maxim populoza di Usa.

Orlando
Kelk imaji pri Orlando.
Lando:	Usa
Stato:	Florida
Informo:
Latitudo:	28°32'01" N
Longitudo:	81°22'33" W
Altitudo:	34 m
Surfaco:	287 km²
Habitanti:	307 573 (2020)
Denseso di habitantaro:	1071,3 hab./km²
Disto de Tallahassee:	393[1] km
Horala zono:	UTC-5 (UTC-4 dum somero)
Urbestro:	Buddy Dyer (D)
Mapo:
Oficala retosituo:
www.cityoforlando.net

Biblioteko dil universitato Central Florida.

L'urbo esas un ek la maxim vizitata urbi de la mondo, e fameskis por esar sideyo di la duesma Disney-lando de la mondo, qua inauguresis en 1971. Ol esas la 4ma maxim vizitata urbo di Usa, dop New-York, Miami e Los Angeles. En 2023, ol recevis plua kam 3,5 milion turisti. Lua aeroportuo esas la 7ma maxim uzata de Usa, e la 18ma maxim uzata de la mondo.

Ultre la parki, Orlando anke havas muzeo pri arto (Orlando Museum of Art), loko por spektakli di danso e teatro (Dr. Phillips Center for the Performing Arts), e diversa kafeerii, drinkerii, nokto-klubi, e grandega norio nomizita Orlando Eye, alta de 122 metri, che parko ICON. L'urbo anke gastigas la kampuso dil Universitato di Central Florida, un ek la maxim granda universitati di Usa.

Geografio

Aeral imajo pri Orlando.

La reliefo di Orlando esas grandaparte plana, kun lagi e marshoza arei. Lua mezavalora altitudo esas 34 metri super la marala nivelo.

La klimato dil urbo esas humida subtropikala (Cfa segun la klimatala klasifikuro da Köppen) kun du sezoni: pluvoza e varma sezono de mayo til la fino di oktobro, e moderema e sika sezono de novembro til aprilo. La mezavalora temperaturi en julio ed agosto (somero) esas 28,1°C, kontre ke la mezavalora temperaturo en januaro (vintro) esas 15,9°C.

La pluvoza sezono iras de mayo til la fino di oktobro, e koincidas kun uraganala sezono di Atlantiko. La mezavalora yarala pluvo-quanto esas 1307 mm, e la maxim pluvoza monato esas junio, kun mezavalore 204 mm. Orlando situesas en regiono riskoza por uragani, tamen pro sua granda disto de litori (124 km de gulfo di Mexikia, e 68 km de Atlantiko), uragani ordinare febleskas ante frapar l'urbo. En 2004, tri forta uragani frapis l'urbo, esanta uragano Charley la maxim forta. Dum recenta yari, uragani Irma (2017), Ian (2022) e Milton (2024) efektigis granda domaji en la urbo.