Wellington

Wellington esas chef-urbo ed importanta portuo di Nova-Zelando. Ol jacas sude de Norda Insulo. Segun statistiki de 2024, ol havis 209 900 habitanti. Lua tota surfaco esas 289,91 km².

Por altra senci di Wellington, videz Wellington (homonimo).

Wellington Te Whanganui-a-Tara
Wellington, chefurbo di Nova-Zelando, fotografita de Monto Victoria.
Standardo	Blazono
Lando:	Nova-Zelando
Informo:
Latitudo:	41°17′20″S
Longitudo:	174°46′38″E
Altitudo:	31[1] m
Surfaco:	289.91 km²
Habitanti:	209 900 (2024)
Denseso di habitantaro:	724 hab./km²
Horala zono:	UTC12 (UTC13 dum somero)
Urbestro:	Tory Whanau
Mapo:
Oficala retosituo:
https://wellington.govt.nz/

Historio

Segun legendo dil populo Maori, Kupe, chefo di regiono Hawaiki - segun Polineziana mitologio, Hawaiki esis la regiono ube Polineziani vivis ante ke li navigis tra Pacifiko - stacis en la naturala portuo ube nun jacas Wellington cirkume yaro 925. Pose, altra Maori explorero, Whatonga, nomizis la portuo Te Whanganui-a-Tara, homaje lua filiulo Tara. Til la yari 1820a, la maxim multa habitanti di la nuna Wellington decendis de Whatonga.

En 1839, kolonelo William Wakefield arivis a la regiono por komprar tereni e pose vendar a Britaniana koloniigisti. Pose, ye la 22ma di januaro 1840, l'unesma koloniigisti arivis per navo Aurora. Do, la koloniigo komencis ante la traktato di Waitangi, signatita ye la 6ma di februaro ta yaro. L'urbo nomesis segun Duko de Wellington qua triumfis dum la batalio di Waterloo, en 1815.

L'urbo subisis sismi en 1848 e 1855. La tero levis inter 2 e 3 m en litoro dum la sismi.

En 1865, l'urbo divenis chef-urbo di Nova-Zelando.