![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/0/0b/Jill_Biden_portrait_%2528cropped%2529.jpg/640px-Jill_Biden_portrait_%2528cropped%2529.jpg&w=640&q=50)
Jill Biden
Bandarískur kennari og forsetafrú / From Wikipedia, the free encyclopedia
Jill Tracy Jacobs Biden (fædd Jacobs, áður Stevenson; fædd 3. júní 1951[1]) er bandarískur kennari og núverandi forsetafrú Bandaríkjanna, fædd í Hammonton í New Jersey í Bandaríkjunum. Hún var varaforsetafrú Bandaríkjanna frá 2009 til 2017. Hún er gift Joe Biden[2], 46. forseta Bandaríkjanna og 47. varaforseta Bandaríkjanna.
Jill Biden | |
---|---|
![]() Jill Biden árið 2021. | |
Forsetafrú Bandaríkjanna | |
Núverandi | |
Tók við embætti 20. janúar 2021 | |
Forseti | Joe Biden |
Forveri | Melania Trump |
Persónulegar upplýsingar | |
Fædd | 3. júní 1951 (1951-06-03) (72 ára) Hammonton, New Jersey, Bandaríkjunum |
Stjórnmálaflokkur | Demókrataflokkurinn |
Maki | Bill Stevenson (g. 1970; sk. 1975) Joe Biden (g. 1977) |
Bústaður | Hvíta húsið, Washington, D.C. |
Háskóli | Háskólinn í Delaware West Chester-háskóli Villanova-háskóli |
Undirskrift | ![]() |
Hún er með bakkalárgráðu[3] og doktorsgráðu frá háskólanum í Delaware[4]. Þá lauk hún prófi í kennsluréttindum frá West Chester háskóla[5] og lauk meistaraprófi í ensku frá Villanova háskóla[6]. Hún kenndi ensku og ritlist við Tækniskólann í Delaware á árunum 1993 - 2008[7]. Hún starfaði auk þess við kennslu inni á geðheilbrigðisstofnunum fyrir ungt fólk með geðrænan vanda[8].
Árið 2009 tók hún við stöðu prófessors í ensku við framhaldsskólann í Virginíu[9] og er talin vera fyrsta varaforsetafrúin sem gegnir launuðu starfi á meðan maki hennar situr í embætti[10]. Hún hefur beitt sér fyrir góðgerðarmálefnum af ýmsu tagi; er stofnandi Biden Breast Health - samtakanna sem starfa í þágu baráttunnar gegn brjóstakrabbameini[11]. Hún er meðstofnandi Book Buddies - verkefnisins í þágu læsis meðal fátækra barna í Bandaríkjunum[12]; meðstofnandi Biden-samtakanna, virk í starfi Delaware Boots on the Ground - samtakanna sem styðja við fjölskyldur bandarískra hermanna[13] og er einnig meðstofnandi Joining forces, samtaka sem einnig starfa í þeim tilgangi, ásamt fyrrverandi forsetafrú Bandaríkjanna Michelle Obama.[14]
Jill Biden hefur lýst yfir að hún hyggist halda áfram kennarastörfum á forsetatíð eiginmanns síns. Hún verður þar með fyrsta forsetafrú Bandaríkjanna sem starfar utan Hvíta hússins.[15]