Dagatal

Dagatal er upptalning daga og kerfi til að skipa þeim niður með því að skilgreina tiltekin tímabil, á borð við vikur, mánuði og ár.^[1] Dagsetning vísar til eins dags í þessu kerfi. Dagatal er almennt heiti á framsetningu slíks kerfis, til dæmis í töfluformi eða sem listi, bæði á pappír og stafrænu formi. Dagatal getur líka verið listi yfir fyrirhugaða atburði, eins og málaskrá.

Veggdagatal frá Indónesíu.

Tímabil í dagatölum miðast oftast (en þó ekki alltaf) við gang sólarinnar eða tunglsins.^[2] Í fornöld var algengt að miða við sólbundið tungltímatal með reglulegum innskotsmánuði til að tryggja samræmi við sólarárið til lengri tíma.^[3]