Svjatlana Tsíkhanoúskaja

Svjatlana Heorhíjeúna Tsíkhanoúskaja (hvítrússneska: Святлана Георгіеўна Ціханоўская; fædd 11. september 1982) er hvítrússneskur mannréttindafrömuður og stjórnmálamaður sem bauð sig fram í forsetakosningunum í Hvíta-Rússlandi 2020. 

Svjatlana Tsíkhanoúskaja
Святлана Ціханоўская
Tsíkhanoúskaja árið 2024.
Fædd	11. september 1982 (1982-09-11) (42 ára) Míkashevskí, Brest-fylki, hvítrússneska sovétlýðveldinu, Sovétríkjunum (nú Hvíta-Rússlandi)
Þjóðerni	Hvítrússnesk
Menntun	Kennslufræðiháskólinn í Mozyr
Störf	Stjórnmálamaður
Flokkur	Óflokksbundin
Maki	Sjarhej Tsíkhanoúskí (g. 2004)
Börn	2
Vefsíða	tsikhanouskaya.org

Tsíkhanoúskaja tók við forystu stjórnarandstöðunnar í Hvíta-Rússlandi eftir að eiginmaður hennar, Sjarhej Tsíkhanoúskí, var handtekinn í aðdraganda kosninganna 2020.^[1]

Sitjandi forsetinn Alexander Lúkasjenkó var lýstur sigurvegari í kosningunum og opinberar tölur gáfu til kynna að hann hefði unnið með 80 prósentum atkvæða.^[2]

Niðurstaða kosninganna var mjög umdeild og Lúkasjenkó var víða sakaður um að hafa haft rangt við. Tsíkhanoúskaja viðurkenndi ekki sigur Lúkasjenkós og tók þátt í fjöldamótmælum gegn kosningunum og einræðisstjórn Lúkasjenkós frá ágúst 2020. Hún flúði til Litáens í mótmælunum af ótta um líf sitt og barna sinna.^[3] Sum ríki, meðal annars Bretland, viðurkenndu ekki niðurstöður kosninganna.

Eiginmanni Svjatlönu, Sjarhej, var sleppt úr fangelsi árið 2025 eftir fund Keiths Kellogg, sendierindreka Bandaríkjastjórnar, með Lúkasjenkó.^[4]