From Wikipedia, the free encyclopedia
ტაგაიტაი (ოფიციალურად ქალაქი ტაგაიტაი; ტაგალ. Lungsod ng Tagaytay) ― მეორე კლასის შემადგენელი ქალაქი კავიტეს პროვინციაში, ფილიპინებში. 2020 წლის აღწერით, ქალაქის მოსახლეობა 85 330 ადამიანს შეადგენს.
ტაგაიტაი | |
ქვეყანა | ფილიპინები |
---|---|
შიდა დაყოფა | Maitim 2nd East |
კოორდინატები | 14°06′00″ ჩ. გ. 120°56′00″ ა. გ. |
დაარსდა | 21 ივნისი, 1938 |
ფართობი | 65.00 კმ² |
ცენტრის სიმაღლე | 292 მეტრი |
მოსახლეობა | 85 330 (1 მაისი, 2020)[1] |
სასაათო სარტყელი | ფილიპინების სტანდარტული დრო |
სატელეფონო კოდი | 46 |
საფოსტო ინდექსი | 4120 |
ოფიციალური საიტი | http://www.tagaytay.gov.ph/ |
პეიზაჟებისა და გრილი კლიმატის გამო, ტაგაიტაი ფილიპინების ერთ-ერთი ყველაზე პოპულარული შიდა ტურისტული დანიშნულების ადგილია. ქალაქის სხვადასხვა წერტილიდან ტაალის ტბისა (ბატანგასი) და ვულკან ტაალის დანახვაა შესაძლებელი. ტაგაიტაი ქვეყნის დედაქალაქიდან 59 კმ-ის დაშორებით მდებარეობს.
ფილიპინების რევოლუციის დროს ტაგაიტაის ქედები და ტყეები მახლობელი პროვინციების რევოლუციონერთა თავშესაფარს წარმოადგენდა.
ტაგაიტაი ჩარტერული ქალაქი 1938 წლის 21 იანვარს გახდა, როდესაც პრეზიდენტმა მანუელ კესონმა თანამეგობრობის №338 აქტს მოაწერა ხელი.[2]
ტაგაიტასი ფართობი 66.1 კმ²-ია, რაც კავიტეს პროვინციის საერთო ფართობის 4.37 %-ს შეადგენს. ქალაქის ჩრდილოეთით მანილის ყურე მდებარეობს, სამხრეთით ― ტაალის ტბა და ვულანი, ხოლო აღმოსავლეთიდან ― ლაგუნა-დე-ბაი.
ტაგაიტაის სამხრეთი და აღმოსავლეთი ნაწილები მთა-ბორცვიანია, რომლებიც ძირითადად, ტყეებით, ფიჭვის ხეებითა და ბალახითაა დაფარული. ქალაქი ტაგაიტაის ქედის გასწვრივ მდებარეობს. ტაგაიტაის ქედი 32 კმ-ის სიგრძისაა და დასავლეთით ბატულაოს მთიდან აღმოსავლეთით სუნგაის მთამდეა გადაჭიმული.[3] ქედის საშუალო სიმაღლე ზღვის დონიდან 610 მეტრია. სუნგაის მთა არა მხოლოდ ტაგაიტაის, არამედ კავიტეს პროვინციის უმაღლესი წერტილიცაა. მისი სიმაღლე 709 მეტრია.
კიოპენის კლიმატის კლასიფიკაციით, ტაგაიტაი რბილი ტროპიკული მუსონური კლიმატის ზონაშია მოქცეული, რაც მანილასთან შედარებით უფრო გრილი ამინდით, ნაკლები ტენიანობითა და უხვი ნალექიანობით ხასიათდება. ქალაქის საშუალო ტემპერატურა 22 °C-ია (72 °F) და იშვიათად აჭარბებს 31 °C-ს (88 °F). დეკემბერ-თებერვალში ქალაქის მაღლობები ნისლიანი, ქარიანი და გრილია. კავიტეს პროვინციის სხვა ტერიტორიების მსგავსად, ტაგაიტაიშიც ორი სეზონი გამოიყოფა: მშრალი სეზონი (ნოემბრიდან აპრილამდე) და წვიმების სეზონი (წელიწადის დარჩენილ დროს).
ტაგაიტაის საშუალო ფარდობითი ტენიანობის მაჩვენებელი 78%-ია. ოქტომბრიდან აპრილამდე პერიოდში ჩრდილო-აღმოსავლეთის ქარებია გაბატონული. მაისიდან სექტემბრამდე პერიოდში სამხრეთ-დასავლეთის ქარები ქრის.
ჰავის მონაცემები — ტაგაიტაი | |||||||||||||
---|---|---|---|---|---|---|---|---|---|---|---|---|---|
თვე | იან | თებ | მარ | აპრ | მაი | ივნ | ივლ | აგვ | სექ | ოქტ | ნოე | დეკ | წლიური |
საშუალო მაქსიმალური °C | 27.0 | 28.0 | 30.0 | 31.0 | 30.0 | 29.0 | 28.0 | 27.0 | 27.0 | 27.0 | 27.0 | 27.0 | 28.2 |
საშუალო მაღალი °C | 24.0 | 26.0 | 27.0 | 29.0 | 28.0 | 26.0 | 25.0 | 24.0 | 25.0 | 25.0 | 25.0 | 24.0 | 25.7 |
საშუალო დღიური °C | 20.0 | 21.0 | 21.5 | 23.5 | 24.0 | 23.0 | 22.5 | 22.0 | 22.5 | 22.0 | 21.5 | 20.5 | 22.0 |
საშუალო დაბალი °C | 16.0 | 16.0 | 16.0 | 18.0 | 20.0 | 20.0 | 20.0 | 20.0 | 20.0 | 19.0 | 18.0 | 17.0 | 18.3 |
საშუალო მინიმალური °C | 13.0 | 13.0 | 14.0 | 16.0 | 18.0 | 18.0 | 18.0 | 19.0 | 18.0 | 16.0 | 15.0 | 14.0 | 16.0 |
საშუალო ნალექი (მმ) | 11 | 13 | 14 | 32 | 101 | 142 | 208 | 187 | 175 | 131 | 68 | 39 | 1 121 |
წყარო: meteoblue.com (modeled/calculated data, not measured locally)[4] |
ტაგაიტაი 34 ბარანგაიდ იყოფა.[5]
2020 წლის აღწერით, ქალაქის მოსახლეობა 85 330 ადამიანს შეადგენს. მოსახლეობის სიმჭიდროვის მაჩვენებელიო 1300 ადამიანი 1 კმ²-ზე.
2010 წლისთვის ტაგაიტაის მოსახლეობა 62 030 ადამიანს შეადგენდა. მოსახლეობის 95.36% რომის კათოლიკური ეკლესიის მიმდევარია. ტაგაიტაის მოსახლეობის 3.37% პროტესტანტია, მათ შორის არიან ქრისტეს ეკლესიის მიმდევრებიც (1.5%).[6][7]
მოსახლეობის უმრავლესობის (93.58%) მშობლიური ენა ტაგალურია. მოსახლეობის ნაწილი ბიკოლანურ (1.52%), ილოკანურ (1.52%) და სებუანურ ენებზე საუბრობს (1%).
ტაგაიტის მზარდი ურბანიზაციის მიუხედავად, ქალაქის ეკონომიკისა და განვითარების მნიშვნელოვან სექტორს სოფლის მეურნეობა წარმოადგენს. 2009 წლისთვის ქალაქის საერთო ფართობის 20% (1 292 ჰა) სასოფლო-სამეურნეო მიწებს ეკავა. ნიადაგის ნაყოფიერებას ვულკან ტაალის ამოფრქვევამაც შეუწყო ხელი, რის შემდეგაც ნიადაგი ვულკანური დანალექებით გამდიდრდა და ანანასის, ყავის, ბანანის, კაკოს, ხილის, ბოსტნეულისა და სხვა სამეურნეო პროდუქტების მოყვანას შეუწყო. სამეურნეო პროდუქტები როგორც ადგილობრივ, ისე საერთაშორისო ბაზარზე გააქვთ. ტურიზმის განვითარებამდე ქალაქში უხვად იყო ხმალაებისა და გვირილების ფერმები.[8]
ქალაქის აღმასრულებელი ხელისუფლების მეთაური მერია. საკანონმდებლო ორგანოს საქალაქო საბჭო (Sangguniang Panlungsod) წარმოადგენს, რომელსაც ვიცე-მერი ხელმძღვანელობს და მერის დროებითი ვაკანსიის დროს აღმასრულებელი ხელისუფლების მეთაურის უფლებამოსილებასაც ასრულებს. 2021 წლისთვის ქალაქის მერი აგნეს დ. ტოლენტინოა, ხოლო ვიცე-მერი ― რეიმონდ ა. ამბიონი. ფილიპინების წარმომადგენელთა პალატაში ქალაქის წარმომადგენელია აბრაჰამ ნ. ტოლენტინო.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.