Строма

Строма (stroma, грек. — төсеніш) — қомақты паренхималы мүшелер паренхимасын байланыстырып біртұтас ететін дәнекер ұлпалық құрылым.

Строма талшықты борпылдақ дәнекер және тығыз дәнекер ұлпаларынан тұрады. Ол паренхималы мүшелердің сыртқы қапшығын және мүшелер паренхимасын бөлікшелерге бөлетін перделіктерді түзеді, қомақты мүшелердің негізін құрап, тіректік қызмет атқарады.

Строма арқылы қомақты мүшелер паренхимасын қоректендіретін қан және лифма тамырлары мен мүшелердің жұмысын реттейтін жүйкелер өтеді. Қантұзу мүшелерінің стромасын ретикулалы ұлпа және ретикуло-эпителиоциттер құрайды.^[1][2]