Коми гижысь котыр

Коми Республикаса гижысь котыр (рочӧн: Союз писателей Республики Коми) — «Россияса гижысь котыр» ставроссияса общественнӧй котырлӧн регионса юкӧн. Артмӧдӧма 1934 воын.

История

1932 воын Коми (Зыряна) асвеськӧдлан обласьтын вӧлі лӧсьӧдӧма гижысь котырлӧн оргкомитет. Коми гижысь котыр лӧсьӧдӧма 1934 вося косму тӧлысьӧ Нёбдінса Виттор, Тима Вень да Николай Попов (Жугыль) водзмӧстчӧмӧн. Коми гижысьяслӧн обласьтса медводдза конференция дырйи правленньӧса медводдза веськӧдлысьнас вӧлі бӧрйӧма Николай Попов (Жугыль).

1936 воын обласьтлысь ним вежӧм вӧсна гижысьясӧс ӧтувтысь котыр кутіс шусьыны Коми АССР-са гижысь котыр. 1930-ӧд воясся репрессияяс бӧрын Коми гижысь котырын коли ӧти пырысь да ӧти пырны кӧсйысь.

Гижысь котырлӧн эм «Войвыв кодзув» литературно-политическӧй журнал, коді петӧ тӧлысьнас ӧтчыдысь комиӧн. 1969-ӧд восянь мукӧдкӧд ӧттшӧтш лэдзӧ «Север» литературно-художественнӧй да общественнӧ-политическӧй журнал (петӧ рочӧн Петрозаводскын). 1986 восянь ВЛКСМ-лӧн Коми реском да Йӧзӧс велӧдан министерствокӧд ӧтвылысь лэдзӧ «Би кинь» челядь журнал.

Ӧтчыдысь вит вонас Гижысь котыр чукӧртлӧ съезд; ветлӧны гижысьяслӧн СССР-са да Россияса съездъяс вылӧ.

Коми Республикаса гижысь котырлӧн правленньӧса веськӧдлысь Андрей Попов.

Веськӧдлысьяс

• Николай Попов (Жугыль) (1934—1935)
• Михаил Доронин (Шыладорса Миш) (1935)
• Василий Юхнин (Луздор Вась) (1938—1948)
• Геннадий Фёдоров (Педь Гень) (1948—1958)
• Георгий Торлопов (Ивӧ Ёгор) (1958—1964)
• Василий Леканов (1971—1978)
• Геннадий Юшков (1978—1992)
• Пётр Шахов (Педот Петыр) (1992—1995)
• Елена Козлова (1995—2021)
• Андрей Попов (2021—)

Котырӧ пырысьяс

Коми гижысь котырӧ пырӧ 50 гӧгӧр морт. ^[1]

• 2013, ӧшым тӧлысь 12 лун — Коми гижысь котырӧ пырисны 9 морт. Витӧн гижӧны рочӧн: Коми Республикаса шылад тэчысьяс котырлӧн веськӧдлысь Михаил Герцман, вӧвлӧм разведчик Виктор Давыдов, кераяс кыпӧдысь Станислав Новиков, укваса олысьяс Сергей Рулёв да Инга Карабинская. Нёльыс гижӧны комиӧн: Любовь Ануфриева, Алёна Шомысова, Иван Ногиев да Алексей Мишарин.^[2]

Ӧшмӧсъяс

• Мартынов В. Союз писателей Республики Коми // Республика Коми: Энциклопедия: в 3-х т. — Сыктывкар, 2000. — Т. 1. — С. 79.

Ӧтуввез

• Союз писателей Республики Коми. Гижысь Котыр