Репарациялар

Репарациялар — эл аралык укукта тынчтык келишиминин же башка эл аралык актынын негизинде кол салган мамлекеттин кол салууга дуушар болгон мамлекет тарткан зыянды төлөп бериши. Репарациялардын көлөмү жана мүнөзү тарткан зыянга жараша аныкталат. Алгачкы жолу репарациялар алуу укугу 1919-жылы Версаль тынчтык келишими, ошондой эле Версаль тутумундагы башка келишимдер менен аныкталган. Анда Германия жана анын союздаштарынын Антантa өлкөлөрүнүн калкына согуштун кесепетинен келтирилген зыян боюнча жоопкерчилиги көрсөтүлгөн. Чындыгында бул келишимдердеги репарациялар чүмбөттөлгөн формадагы контрибуция катары болгон. Нацисттик Германия жана анын союздаштарынын Экинчи дүйнөлүк согушта келтирген зыянды төлөө боюнча репарациялардын формасы 1945-жылы Крым конференциясында аныкталган.

Булактар

• “Кыргызстан” улуттук энциклопедиясы: 6-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. 816 бет, илл. ISBN 978 9967-14-117 -9