Incursio Russica in Ucrainam (2022)
From Wikipedia, the free encyclopedia
Incursio Russica in Ucrainam, sive praecipuum negotium militare (publica appellatio Russica[1]), commota est, cum armatae copiae Russicae die 24 Februarii 2022 in Ucrainam invasissent Bellum Russo-Ucrainicum magnopere amplificantes, illud certamen, quod anno 2014 post Res Novas Dignitatis (Ucrainice Революція гідності) coeperat. Quae incursio maximum exsulum discrimen Europaeum post bellum mundanum secundum effecit,[2][3] plus quam quinque et dimidio millionibus Ucrainorum patriam relinquentibus[4] et quarta omnium incolarum parte a loco suo mota.[5][6] Ordo mundi sanitarius rem necessitatem medicam appellavit.[7][8]
Haec pagina res recentissime gestas tractat. Crebre mutari potest. |
Bello Russo-Ucrainico anno 2014 conflato Russia Crimaeam in suam dicionem redegit et secessionistae a Russia adiuvati partem Donbas regionis in Ucraina meridiana et orientali corripuerunt, bellum regionale ibi moventes.[9][10] Russia anno 2021 exeunte magnas vires militares ad fines suos cum Ucraina vocavit, usque ad 190 000 milites et eorum armamenta praemittens. Vladimirus Putin, praeses Russicus, in emissione radiophonica imter incursionem opiniones irredentisticas nuntiavit,[11] Ucrainae ius civitatis denegavit,[12][13] ac perperam[14] dixit Ucrainam a neonazistis regi, qui ethnicam minoritatem Russicam insectarentur.[15] Praeterea dixit Consociationem ex pacto Atlantico Septentrionali (OTAN) incolumitatem reipublicae Russicae per amplificationem ad orientem ex annis 2000 ineuntibus minitari, quam affirmationem OTAN ipsa in dubium vocavit.[16] Russia postulavit, ne OTAN se diutius extenderet nec umquam cum Ucraina consociaret.[17][18] Civitates Foederatae aliaeque civitates dixerunt Russiam Ucrainam oppugnare aut invadere velle, quod autem legati Russici identidem usque ad 23 Februarii 2022 negabant,[19] false, ut eventus manifesto (vide "Cursum" infra) mox docebant.
Vladimirus Zelens'kyj, praeses Ucrainae, rationes diplomaticas abrogavit et legem militarem declaravit. Consociatio Nationum et magnae civitates, inter quas Britanniarum Regnum, Francia, Germania, Iaponia, Italia, Polonia, et Hispania,[20][21] atque Unio Europaea rem gestam condemnaverunt.[22]