Anses

Anses,^[1] vel Asae^[2] (Nordice antique sg. ǫ́ss, áss, ás, pl. aesir), in mythologia Nordica sunt dei Asgarthi, unum ex tribus deorum generibus, quorum alii sunt Vani^[3] et Alfi.

Anses circa corpus Balduri congregantur. Pictura a Christophoro Gulielmo Eckersberg anno 1817 facta.

Deae Asarum Asides^[4] vel Asyniae^[5] nominantur (Nordice antique sg. ásynja, pl. ásynjur).

Index

Edda Snorronis dicit duodecim Asas esse^[6], sed postea quattuordecim enumerat; hi sunt

• Othinus
• Thorus
• Balderus
• Nioerdus
• Freyus
• Tyr
• Bragius
• Heimdallus
• Hoedus
• Vidar
• Valius
• Ullus
• Forsetius
• Lokius

Sed noti sunt et alii, ut Hermodus qui ad Balderum revocandum ad Helam profectus erat vel Hoenir qui apud Vanos ut obses manet (sicut Nioerdus apud Asas), Modius et Magnius Thori filii etc.

Asides in Edda etiam quattuordecim enumerantur^[7]. Hae sunt:

• Frigga
• Saga
• Eira
• Geviona
• Fulla
• Freia
• Sioefna
• Lofna
• Vaera
• Vara
• Syna
• Hlina
• Snotra
• Gna

Sed protinus etiam duae adduntur, Sól et Bila, aliaeque bene notae sunt, ut Iduna Bragii uxor et Sigyna Lokii uxor et Sivia Thori uxor.

Fabulae

Fabulae de Asis cunctis aliquot notissimae sunt; bellum contra Vanos Asae gesserant, nullo victore, et obsides dederunt et acceperunt pacis servandae gratia; Balderum amiserunt; in Crepusculo deorum omnes peribunt.