Embryophyta

Embryophyta^[1] sunt subdivisio plantarum muscos, hepaticas, anthocerotes, Horneophytopsida et plantas vasculares (seu Tracheophyta) continens.^[2] Cum maxima pars Embryophytorum in terris vivat, reliquarum plantarum vero, e contra, in aquis, in multis linguis pro Embryophytis nomen plantarum terrestrium (Anglice: land plants, Francogallice: plantes terrestres) simpliciter, etiamsi minus accurate usurpatur.^[3] Apud nonnullos auctores autem nomen plantarum ad sola Embryophyta restringitur.^[4]

Embryophyta varia: in caldario horti botanici Vasingtonensis monstrantur plantae ad Bryophyta, Lycophyta, Filicophyta et Cycadophyta pertinentes.

Locus in systemate plantarum

Embryophyta saepius tamquam infraregnum^[5] habentur, pars subregni Viridiplantarum, quarum altera pars, inter algas connumerata, Chlorophyta nuncupatur.^[2] Appellatio antiquissima harum plantarum est Cormophyta^[6] (a Graeco κορμός, truncus), sed nomen Embryophytorum frequentius in usu est. Est et aliud synonymum, Telomophyta nempe, ad theoriam Zimmermannianam evolutionis plantarum se referens.^[7]

In aliis autem systematibus Embryophyta et Charophyceae partes Streptophytorum sunt,^[8] vel Embryophyta (Embryobionta) et Charophyta omnia Streptobiontorum.^[3]

Descriptio

Embryophyta a reliquis plantis differunt praesertim:

• sporophytis multicellularibus per meiosin sporas cum parietibus sporopollenino incrustatis producentibus;
• gametangiis (structuris ubi gametae originem ducuntur) multicellularibus, archegoniis nempe et antheridiis;
• zygoto retento nutritoque (tamquam embryo, unde et nomen) in archegonio.^[9]

Evolutio

Fossilia corporum Embryophytorum antiquissimorum desunt, unde et origo eorum de sporis agnoscitur. A palynologis monstratur spores periodo Ordovicii medii mutatas esse, maiores nempe factas esse, formasque earum magis regulares, quod pro testimonio originis Embryophytorum illo tempore habetur.^[10] Embryophytum vero antiquissimum bene cognitum (cuius scilicet corpus bene recognoscitur), Cooksonia, Silurio vixit.^[11]

Embryophyta dividi possunt in Bryophyta sensu lato, quorum sporophytum sporangium unicum semper habet, atque Polysporangiophyta, sporophytis ramificatis. Polysporangiophyta Silurio apparuisse putantur.^[12]

Numerus hodiernarum specierum Embryophytorum circiter 330 000 est, e quibus 308 000 angiospermarum.^[13]