Merkaz ARav

Merkaz ARav (en ivrit, מרכז הרב, sentro del Rav (Kook)) o Merkaz ARav Kook (מרכז הרב קוק), es una yeshiva nasional-relijioza en la maále de Givat Shaul en Yerushalayim, Medinat Yisrael, fondada enel anyo 1924 por el Sinyor haham Avraam Itzhak Kook. Kuando la jente avla del Rav Kook i sus shiurim i ovras, avla de Merkaz ARav.^[1] Es la yeshiva mas konosida i emportante del movimento nasional relijiozo en todo el mundo. Los hahamim lideres del movimento, ansina komo munchos roshei yeshiva, hahamim de sivdades i morim en lisés relijiozos, an sido elevos de esta yeshiva, la kuala es sentrala enel dezvelopamyénto del zionismo relijiozo. La yeshiva fue fondada enel anyo 1924, kuando el rav Avraam Itzhak Kook era ainda Rabino Shefe Ashkenazi de Israel i esta konsiderada komo la priméra yeshiva zionista. El Rav Kook la yamava "la yeshiva sentrala mondiala", ubikada en Yerushalayim kon el buto de ser una lampa espirituala i de Tora para Israel i el Galut. El rav Kook konvidó al Rav Avraam Borstein para ser endjuntamente rosh yeshiva kon el, ma murió dos anyos dempués. Kuando el Rav Kook murió, el nombre de la yeshiva fue trokado a "Merkaz ARav" en su onor.

Una de las fráguas de la yeshiva

Dempues de la muerte del Rav Kook, su elevo el Rav Yaakov Moshe Harlap fue el Rosh Yeshiva. ^[2] Dempués de la muerte del Rav Harlap enel anyo 1952, el ijo del Rav Kook, el Rav Zvi Yehuda Kook, tomó el lugar del su padre. En 1982, dempues de la muerte del Rav Zvi Yehuda Kook, el Rav Avraham Shapira pasó a ser el rosh yeshiva asta su muerte enel anyo 2007, kuando su ijo, el Rav Yaakov Shapira shlit"a, tomó el su lugar. Oy endiya, la yeshiva tiene unos 500 elevos, unos 200 de eyos elevos del kollel de la yeshiva.

En las primeras anyadas, la yeshiva tinía pokos elevos, ma en la anyada de los '50, arrivaron munchos elevos de las eskolas relijiozas del movimento Bnei Akiva en buskhida de edukasiyon relijioza i para esos diyas la unika yeshiva zionista era Merkaz ARav; el rav Moshe Zvi Neria, elevo del Rav Kook, enkorajó a sus elevos ambezar en Merkaz ARav.^[3]

Elevos emportantes

Esta lista nombra a myémbros de la Knesset i lideres de la sosyeté yisraeli:^[4]

• Rav Shlomo Aviner
• Rav Yaakov Ariel
• Rav Yoel Bin-Nun
• Azriel Carlebach, fondador del djurnal Ma'ariv.
• Rav Zfania Drori
• Rav Haim Druckman
• Rav Moshe Levinger fondador de la komunita djudia de Hevron dempues de 1967.
• Rav Zalman Baruch Melamed
• Hanan Porat, Myémbro de la Knesset
• Michael Ben-Ari, Myémbro de la Knesset
• David Raziel, komandante del Irgun.
• Michel Warschawski, fondador del Sentro de Informasion Alternativa^[5]
• Nissan Ben-Abraham

Ver endemas

• Atako a Merkaz ARav