Sami Levi

Sami Levi es un kantadero i musiko sefardi de la Turkiya, konosido por la su partisipasion enel grup Sefarad.

Sami nasio el 13 de Avril de 1981 en Estambol^[1] i akabó el kolej enel anyo 1998, en la eskola Göztepe Lisesi de esta misma sivdad. Ya en la su chikés, kuando estava enel djardino de ninyos, empiesó a tener kontakto kon la musika i amostrar el su entereso por eya.

El su kontakto kon la musika en djudeoespanyol

Sami empiesó a aprender kantikas en djudeoespanyol kon la su bavá, desde chiko. Es komun en las famiyas sefardis de la Turkiya ke los mayores avlen sólu djudeoespanyol entre eyos, i la bavá de Sami avlava a el en este lashon. En la su famiya, Sami konosió las kantikas tradisionalas de la komunita sefardi.

Enel anyo 1996, konose a Cem Stamati, i antonses endjunto a Ceki Benşuşe ^[2] dempues desiden kriar el grup musikal Sefarad, enel kualo Sami es el kantadero lider^[3]. Resyentemente empiesó la su karriera komo kantadero en solo, en la kuala tiene dos diskos, uno un maksi-single, Hade Hade Duke Duke^[4] i un album kompleto, Disco Kolbastı ve Balkan Havaları^[5][6][7]

Diskografiya

• Hade Hade Duke Duke (2008)
• Disco Kolbastı ve Balkan Havaları (2009)
• Seve Seve (2011)