Luc Deitz

Luc Deitz
Gebuer	13. Mäerz 1961 Lëtzebuerg
Aktivitéit	Bibliothekär
Member vun	Academia Europaea

No senger Première A classique am Dikrecher Kolléisch, 1980, huet hien ee Joer laang um Centre universitaire de Luxembourg Griichesch a Latäi studéiert, an dat Joer drop op der Universitéit Paris IV. Vun 1982 bis 1986 huet hien op der Eberhard-Karls-Universität Tübingen Klassesch Philologie (Griichesch a Philosophie) studéiert a mat engem Staatsexame fir Lycéesprof ofgeschloss.

Vun 1986 bis 1988 war den Deitz Fuerschungsassistent op der Universitéit Konstanz fir Latinistik a vun 1988 bis 1990 war hien Assistent op der Universitéit Konstanz. 1989 bis 1992 hat hien eng Frances A. Yates Bourse fir um Warburg Institute zu London ze fuerschen. 1991 huet hie summa cum laude säin Doktorat an der Laténgescher Philologie op der Universitéit Konstanz kritt. 1992 bis 1995 war hie Postdoctoral Research Fellow vun der British Academy um Warburg Institute. Vun 1995 bis 1997 war hien Alexander von Humboldt Fellow am Departement fir klassesch Philologie op der Ruprecht-Karls-Universität Heidelberg.

Zënter 1997 leet den Deitz de Service fir Manuskripter an Zimelie vun der Lëtzebuerger Nationalbibliothéik. Ufanks als Assistenzprofesser (1999-2003), duerno (vun 2002 un) als Professeur associé, huet hie griichesch a laténgesch Philologie um Centre universitaire de Luxembourg enseignéiert.

Zënter der Grënnung am Joer 1999 ass hie Member vum Redaktiounscomité vum Neo-Latin Yearbook. Am Summersemester 2000 hat hien de Léierstull (Mëttelalterlech Latäin Philologie) op der Albert-Ludwigs-Universität Freiburg. Vun 2001 bis 2002 huet hien op der Universitéit Tréier Latäin a Philologie enseignéiert. Nodeems hien 2002 seng Habilitatioun op der Uni Tréier op Basis vu senger Aarbecht ofgeschloss hat an d'Venia Legendi fir Latäin Philologie mat engem besonnesche Schwéierpunkt op Mëttel- a Neilatäin kritt hat, war hie vun 2002 bis 2009 Privatdozent fir Mëttelalterlatäin zu Tréier. Hie war vun 2007 bis 2012 Discipline Representative for Neo-Latin Literature bei der Renaissance Society of America. 2007 gouf hie Membre correspondant vum Institut Grand-Ducal, Section de linguistique, d’ethnologie et d’onomastique. Zënter 2009 ass hie Professeur-adjoint fir Latäin aus dem Mëttelalter an der Renaissance op der Universitéit Tréier. Vun 2010 bis 2017 huet hien als Assistenzprofesser fir Griichesch Philologie op der Universitéit Lëtzebuerg enseignéiert.

Mam Thomas Falmagne als Haaptredakter ass hie verantwortlech fir d'Serie Die Handschriften des Großherzogtums Luxemburg.

Seng Fuerschung konzentréiert sech op de Platonismus am Mëttelalter an an der Renaissance (besonnesch de Francesco Patrizi da Cherso); d'Poetik an d'Rhetorik an der Renaissance (besonnesch de Julius Caesar Scaliger); an d'Geschicht vun der Wëssenschaft tëscht 1500 an 1750.

Liewen a Karriär

Publikatiounen (Auswiel)

Quell

Referenzen

Wikiwand - on