Zaerem

Dit artikel is gesjreve (of begós) in 't Zaerems. Laes hie wie v'r mit de versjillende saorte Limburgs ómgaon.

---

Zaerum

Zaerum (Nederlandse naam Sevenum) is 'n derp in de gemènte Haors aan de Maas in noordelik Nederlands Limburg. 't Derp Zaerum telde op 1 januari 2023 6.890 inwoeëners. Daomej is 't nao Haors de op ieën nao groeëtste plats in de gemènte. Wies 1 januari 2010 waor Zaerum 'n zelfstendege gemènte. Ze tèlde op 1 december 2005 7.500 inwoeners; 't oppervlak waor 45,62 km². D'r waore drei kèrne, van klein nar groeët:

• De Pieël
• De Kroeënenberg
• Zaerem

Zaerum-derp.  Huur de kèrkklokke luje.

Historie

Zaerum is van âwdsher 'n esderp. Al in de bronstiêd en iêzertiêd waas d'r al bewoeëning. Det bliekt oêt 'n paar vondste oêt dae periode. 't Derp Zaerum wört vör 't ers genumd in 1317, in 'n aaflaotbreef waor ok de petroeënheilige van de kerk in staon: Fabianus en Besjanus. Dae laeste stieët ok in 't Zaerumse wape en in de vlag.

In 1674 waort de plats 'n hieërlikheid, wat 't wies de Fransen tied bleef. De grónk van de Pieël waort vanaaf de achtinde ieëw ontgónne; 't derp De Pieël óntstóng zoeë in 1959. Op 1 januari 2010 is de gemènte opgegaon in de naobergemènte Haors aan de Maas.

Zaerums dialect

't Zaerums is 'n aovergangsdialect tusse 't Kleverlands, 't Limburgs en 't Braobants. Mieër details staon beej 't Zaerems en beej Limburgse dialecte. Sinds 2021 haet 't Zaerums 'n online waordebook.