Zuid-Gelders

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

't Zuid-Gelders nao Jo Daan (raos lijn) aofgezat tegen 't Kleverlands nao Jan Goossens (blauw veld).

't Zuid-Gelders is 'n dialekgróp die door sommege oonderzeukers weurt aongehawwe, mèt naome door Jo Daan in häör indeiling vaan de Nederlandse dialekte. Kort gezag umvat ze de mieste dialekte in de provincie Gelderland die neet bij 't Nedersaksisch hure.

Oonder 't Zuid-Gelders valle de volgende stads- en streekdialekte:

• 't Nederbetuws en 't Euverbetuws, in de Betuwe, mèt oetzundering vaan Culemborg en Beusichem
• 't Riek-vaan-Nimweegs mèt 't Nimweegs stadsdialek, in 't Riek vaan Nimwege
• 't Liemers in de gelieknaomege striek
• 't Arnhems (Ernems) en nog get dörpsdialekte aon de zuidkant vaan de Veluwe
• 't Rhenens in de Utrechse stad Rhenen (boe me vaanajds gij in plaots vaan jij zeet)

In de ouge vaan de sprekers vörme dees dialekte 'n huurbaar einheid. Dit is veur Daan ein rei gewees veur ze same te gróppere.^[1] Taolkundege gezeen zien ze evels hendeg divers. Daobij vörmp de provinciegrens (en de Maos, de revier die veur e groet deil die provinciegrens vörmp) gein belaankrieke taolgrens. In väöl opziechte vörmp Zuid-Gelderland 'n einheid mèt 'n aonligkend gebeed in Braobant en Limbörg.

In modern indeilinge weurt de naom Zuid-Gelders daorum neet gebruuk. Jan Goossens deilt 't Euverbetuws, 't Riek-vaan-Nimweegs en 't Liemers in bij 't Kleverlands. Dao zouw 't daan same mèt get dialekte oet Braobant, Limbörg en Duitsland oonder valle. Ouch de dialekte vaan Arnhem en direkte umgeving zouw me bij 't Kleverlands kinne zètte. 't Nederbetuws vèlt te plaotse bij 't Braobants; 't heet evels ouch raokpunte mèt 't Utrechs.