Мокшень сёрмадомась

Мокшень сёрмадомась - кунардонь мокшень тяшкснень сёрмадома ситсемсь, конась ащесть лама тёждя ди стака символда. Сонь нолдасть тевс Кристозыяфтомада инголе пъцтай ХХ сядокиза самс. Эрь мокшень юропть ули эсь башка юромтяшксоц.

Тонафнеманза

XVII сядокизоста ни рузонь тяшни ломаттне шарфтсть мяль мокшень сёрматнень-тяшкснень лангс. Синь колгаст сёрмадсть Д.Пушечников ди А.Костяев. XIX - XX сядокизотнень мокшень ди эрзянь тъналонь-юромонь тяшкснень тонафнезь В.Н.Майнов, Н.Н.Харузин, П.Ф.Степанов, Б.П. Темногрудов ди илятне. В.Н.Майнов кочкась тяфтама 150 сёрма. Сон тяштсь: "мокшесь эди эрзясь эсь сёрмазон путнесыне сембе паршихнень лангс, тяфта синь няфнесазь кинь тя паршись". ^[1]

Ванфтовсь тяфтама сёрма кучф 1888 кизоня Саратувонь губернияста ушманти Никита Колесниковонди кона ушмосоль Питерьбурса.

Никита Колесниковть сёрмась 1 - Пеелем (Никитань альняканц тяштьксоц); 2 - сотф лишме; 3 - куд; 4 - ши (колма шит ётасть); 5 - модас тусь (кулось); 6 - ава (ава ломань); 7 - ведь (сельмоветть); 8 - шаба (колма шабат); 9 - кши туркс кикс мархта (кшинь аф сатнемась); 10 - лишме + ярмак (кучемс ярмак лишмонь рамама сатови); 11 - Сенькс (Пеелем юромста авась); 12 - полань суркст (ърьвяяма-ърьвакс лисема); 13 - Шары (Колесников Петрань юром тяштьксоц) ;

Тя сёрмать морафтомац азонды вага мезе: «Федя альнякаце сась куду (ингольдень сёрмаста Никита содазе сон якась салонь ускома Эльтону), колма шида меле кулось, сонь ърьвац аварди, колма шабанза вачедот. Никита, кучт ярмак.» Тяда башка сёрмаса азфоль «Сенькс (Никитань альняканц стирец) лиссь ърьвакс Колесников Петранди».