Fotografi
From Wikipedia, the free encyclopedia
Fotografi (bahaso Inggirih: photography, nan diambiak dari bahaso Yunani yaitunyo "phos": cahayo jo "graphien": malukis/manulih) adolah proses malukis/manulih manggunoan media cahayo. Sabagai istilah umum, fotografi bararti proses atau metode untuak manghasiakan gambar atau foto dari suatu objek jo caro marekam pantulan cahayo nan manganai objek tasabuik pado media nan peka cahayo. Alaik paliang populer untuak manangkok cahayo iko adolah kamera. Tanpa cahayo, indak ado foto nan bisa dibuek.[1]
Prinsip fotografi adolah mamfokuskan cahayo jo bantuan pambiasan sahinggo mampu mambaka medium panangkok cahayo. Medium nan alah dibakar jo ukuran luminitas cahayo nan tapek akan manghasiakan bayangan identik jo cahayo nan mamasuki medium pambiasan (salanjuiknyo disabuik lensa).[2]
Untuak manghasiakan intensitas cahayo nan tapek bia manghasiakan gambar nan rancak, mako digunoan bantuan alaik ukua barupo lightmeter. Sasudah mandapek ukuran pancahayoan nan tapek, saurang fotografer dapek mangatur intensitas cahayo tasabuik jo caro mangubah kombinasi ISO/ASA (ISO Speed), diafragma (Aperture), jo kacepatan rana (speed). Kombinasi antaro ISO, diafragma & speed disabuik sabagai pajanan (exposure).[3]
Di era fotografi digital di mano film indak digunoan, mako kacepatan film nan samulo digunoan bakambang manjadi digital ISO. Fotografi pado maso kini alah bakambang manjadi sabuah gaya hiduik, hal iko dimulai samanjak muncuanyo era digital dan bakambangnyo media sosial.[4]