Вистинска приказна за исчезнувањето на приказните

„Вистинска приказна за исчезнувањето на приказните“ — роман за деца на македонската писателка Билјана Станковска. Книгата е објавена во 2016 година од книгоиздателството „Феникс“ , библиотека Ви Арт, а илустрацијата на корицата е на Хенри Матиз со сликата „No strings attached". Книгата е каталогизирана во НУБ„Св. Климент Охридски“ -Скопје со ISBN број 978-9989-33-594-5. Романот е изборна лектира за четврто одделение.^[1]

Вистинска приказна за исчезнувањето на приказните

Автор	Билјана Станковска
Земја	Македонија
Јазик	македонски
Жанр	роман
Издавач	Феникс (издавачка куќа)
Издадена	2016
Медиум	печатено издание
ISBN	978-9989-33-594-5

Содржина

Романот се состои од 11 приказни, кои се меѓусебно поврзани поглавја. Приказната започнува во две различни земји,Земјата на морињата и Земјата на приказните, а протагонистите се поврзани и комуницираат преку видео врска, за да полека се разврзе магична приказна за разделеното семејство во просторот, но не и во духот. Леа и нејзините братучеди,Лука и Матеј, од Земјата на приказните заедно со бабата, двете сестри- тетки, двајцата тетиновци и вујкото, во ова модерно четиво се во поход да ги спасат приказните кои мистериозно исчезнуваат.

Осврт кон делото

Во ова дело на Билјана Станковска се присутни магични елементи во реален простор, со компјутери, видео врски и цд-а, видео игри и цртани филмови. Авторката низ вешт и дијалошки испреплетен текст успева да разврзе приказна каде фантазијата на децата успева да ги разреши загатките кои им се поставени како предизвик. Романот изобилува со случки и интертекстуалност каде Петар Пан е лик од приказните чии текстови се избришале, но и кукла која ги спојува мајката и таткото на Леа, уште пред нејзиното раѓање, а се појавува чудесно во рацете на таинствената госпоѓа со чудна шапка.