Наташа Бедингфилд

Наташа Ен Бедингфилд (англиски: Natasha Anne Bedingfield; родена на 26 ноември 1981) ― англиска пејачка и текстописец.

Наташа Бедингфилд
Бедингфилд присуствува на Австралиските награди за модна фризура во 2013 година во Сиднеј, Австралија
Животописни податоци
Родено име	Наташа Ен Бедингфилд
Роден(а)	26 ноември 1981(1981-11-26) (43 г.) Хејвордс Хит, Западен Сасекс, Англија
Жанрови	Pop R&B
Занимања	Пејачка текстописец
Период на активност	2001–денес
Издавачи	Phonogenic Epic We Are Hear
Мреж. место	natashabedingfield.com

Животопис

Наташа Бедингфилд е родена во Хејвордс Хит, Западен Сасекс (подоцна се преселила во Луишам, населба во Јужен Лондон). Нејзините родители биле новозеландски иселеници. За време на детството, Бедингфилд одредено време живеела во Окленд, Нов Зеланд.^[1] Како тинејџерка, таа со нејзиниот брат и сестра, Даниел и Никола, ја основале денс-електронската група „The DNA Algorithm“. ^[2]

Бедингфилд една година студирала психологија на Универзитетот во Гринич, ^[3] а потоа го напуштила да се насочи на пеење и пишување песни. Во раните 2000-ти, Бедингфилд компонирала, напишала и снимила песни за Hillsong Church UK. Нејзините песни се појавиле на албумите во живо Blessed, Shout God's Fame и на детскиот албум Jesus Is My Superhero од Hillsong Music Australia.^[4]

На 21 март 2009 година, Бедингфилд се омажила за американскиот бизнисмен Мет Робинсон во Малибу, Калифорнија, САД.^[5] Во ноември 2017 година се родил нивниот син.^[6]

Кариера

Во 2004 година го издала нејзиниот прв албум, Unwritten, кој претежно содржел брзи поп-песни и бил под влијание на R&B музиката.^[7] Со преку 2,3 милиони продадени примероци албумот бил успешен во светски рамки.^[8] Бедингфилд била номинирана за Греми награда за најдобра женска поп вокална изведба за насловната песна од албумот „Unwritten“, а на Британските музички награди во 2005 и 2006 година таа била номинирана за најдобар британски женски изведувач.^{[9] [10]} Од албумот Unwritten, исто така, произлегола нејзината единствена песна на прво место во Велика Британија, „These Words“.

Во 2007 година го објавила нејзиниот втор албум, NB. Две песни од албумот се пласирале во топ-10 на листата за синглови во Велика Британија: „I Wanna Have Your Babies“ и „Sоulmate“. NB не бил издаден во Северна Америка, но шест песни од тој албум и седум нови песни биле вклучени во албумот издаден под името Pocketful of Sunshine во 2008 година. Од тој албум сингловите „Love Like This“ и „Pocketful of Sunshine“ биле успешни на топ листите. Во декември 2010 година, Бедингфилд го издала нејзиниот трет албум во Северна Америка, Strip Me, со истоимената песна која на топ-листата на американскиот Билборд Хот 100 се пласирала на 91 место. Бедингфилд продала преку 10 милиони албуми и 10 милиони синглови ширум светот, со вкупно над 20 милиони плочи ширум светот. Во 2012 година, VH1 ја рангирал Бедингфилд на 66-то место на листата од 100 најдобри жени во музиката.^[11]

Дискографија

• Unwritten (2004)
• N.B. (2007)
• Strip Me (2010)
• Roll with Me (2019)