Огледало (книга)

Огледало е книга на Кирил Пејчиновиќ, печатена во 1816 година во Будим, во тогашната Австриското Царство.

Огледало

Насловната страна на Огледало
Автор	Кирил Пејчиновиќ
Изворен наслов	Ѡгледало
Земја	Австриско Царство
Јазик	народен јазик (тетовски говор), црковнословенски јазик
Издадена	1816
Страници	148
Следна	Утешение грешним (1840)

Содржина

Книгата е печатена со црковнословенски шрифт. Форматот и е мала осминка. Покрај 4 ненумерирани, таа содржи 148 нумерирани странички (во нумерацијата е направена една грешка: по стр. 76 следува 87, така што последната бројка е 158, за десет повеќе од стварниот број на страниците).

Книгата ја има следната содржина:

1. Послједование, пострижение монаха, одјејание расси и камилавки 1-3
2. Сказание о молитвје свјатаго Нифонта јако ова пријатна јест пред Богом 3-6
3. Молитва свјатаго Нифонта 6-18
4. Сказание о молитвје свјатаго Трифона како подабает пјети 19-20
5. Молитва свјатаго Трифона 20-36
6. Сказание како подобает звучити отрока азбуки 36-39
7. Чин благословение отроков 39-48
8. Молитва 7 отроком немогушчим спати болним 48-53
9. Молитва за всекаква болест со параклис Богородичен 53-54
10. Молитва от очес призора сиреч за уроци 55-57
11. Поучение свакому Христиану, како подобает празновати празници Господских и свјатих и како подобает причаститисја свјатим причашчением 58-145 (155)
12. Молитва свјатаго Арханѓела Михаила 146-148 (158).

Како што се гледа, најголемиот дел од книгата го зафаќа словото за празниците, оригинална проповед на народен јазик. На народен јазик се пишувани и сказанијата (под бр. 2, 4, 6 во содржината), а при молитвите само некои кратки објасненија. Другото е на црковнословенски јазик.

Молитвите и последованијата во „Огледало“ се земени повеќето од требниците. Сказанието за молитвата на св. Трифона и трите негови молитви се извлечени од еден ракописен црковен устав од XV в., што го имал при рака Кирил (Хлудова збирка бр. 123). Сказанието за молитвата на св. Нифонта и таа молитва се земени од Прологот, од житието на светецот. Одломки од словото за празниците има објавено Стојан Новаковиќ во книгата „С Мораве на Вардар“, Београд 1894 г. 90-106, со современа транскрипција. Притоа ред грешки од првото издание не се исправени, а има случаи да се направени и нови.