Пикометар

Пикометар (симб. pm, пм) — единица за должина во метричкиот систем еднаква на еден билионити дел (¹⁄_{1.000.000.000.000}) од метарот. Може да се претстави во научен запис како 1×10⁻¹² м или како 1 E−12 м во инженерски запис. Попрост начин на претставување е 1 м / 1.000.000.000.000.

Упростен приказ на хелиумски атом, кој има пречник од 62 пикометри^[1]

Еден пикометар е еднаков на една милионитина од микрометарот (микрон) и порано се нарекувал микромикрон, стигма или бикрон со симбол µµ.^[2][3] Сто пикометри сочинуваат еден ангстрем.

Примена

Пикометарот е мошне мала единица и се користи исклучиво во честичната физика, квантната физика, хемијата и акустиката. Атомите имаат пречник помеѓу 62 и 520 пм, а типичната должина на единечна јаглеродно-јаглеродна врска изнесува 154 пм. Големината на помали честички како делови од атомот, хадроните итн. се изразуваат во помали мерки, сè до горната граница на точкестите фермиони.

Во 2034 г. се предвидува да се пушти сондата Ласерскоинтерферометарска вселенска антена (LISA) со цел неспоредно да го утврди присуството на гравитациски бранови. Релативното поместување на брановите ќе се мери со разделна моќ од 20 пикометри, на растојание од 5 милиони километри, давајќи чувствителност од 1 на 10²⁰.

Поврзано

• Ангстрем