Стар театар „Антон Панов“

Стар театар „Антон Панов“ — театарска зграда во градот Струмица, прогласена за значајно културно наследство на Македонија.^[1]

Стар театар „Антон Панов“
Поглед на театарот
Општи податоци
Статус	споменик на културата
Вид	театар
Стил	класицизам
Адреса	ул. „Боро Џони“ бр. 5
Град	Струмица
Земја	Македонија
Почната	1948
Завршена	1949

Историја

Градбата е сместена во градскиот центар, на улица „Боро Џони“ бр. 5. Изградена е од есента 1948 до мај 1949 година со доброволен труд на граѓаните. Била изведена масивно, со приземје и кат со влез од север. Во 1969 година е извршена реконструкција, при која внатрешноста е обновена од уметникот Александар Јанкуловски и вајарот Насо Беќаров. Приземјето имало влезно фоаје, билетарница и скалила кон катот. Салата имала 460 седишта и две ложи по страните. Лево и десно од сцената имало работилници, гардероби и други придружни простории. Внатрешноста била богато украсена со мозаици и бакарни апликации.^[1]

На почетокот на XXI век била зачувана само предната северна фасада кон улицата „Боро Џони“ и влезната врата, која е впечатливо изработена од дрво со бакарни апликации. Предната фасада е со нагласен централно поставен влез со два пиластра со капители. На приземјето има по еден прозорец лево и десно од влезот, а на катот се распоредени четири симетрични прозорци. Фасадата завршува со профилиран венец и профилиран тимпанон. Вратата била пренесена во Домот на културата.^[1]

Градбата била целосно уништена откако настрадала во пожар. Во 2012 година отпочнала нејзината обнова во изворен облик.^[2][3]

Поврзано

• Културно наследство на Македонија во Општина Струмица