Трапист (сирење)

Трапист — вид на полутврдо сирење кое традиционално го прават монасите траписти.

Трапист
Област	Франција Белгија Босна и Херцеговина САД Индустриско производство: Унгарија, Германија, Хрватска, Австрија, Словенија
Текстура	полутврдо сирење
Масност	полномасно или полумасно сирење
Големина	16 до 18 см (пречник) 5 до 8 см (висина)
Тежина	1 до 1,5 кг
Узревање	5 до 12 недели

Одлики

Сирењето трапист може да биде полно или полумасно според содржината на маснотии. Сирењето се прави во облик на пити, со пречник од 16 до 18 см и висина од 5 до 8 см, со тежина од 1 до 1,5 кг. Сирењето има фина, флексибилна текстура. На површината нема маснотии, кората е мазна, тенка и златножолта, понекогаш со исушена црвена маст. Во текстурата речиси и да нема дупки, но ако ги има, тие се со големина на леќа, со пречник од 2 до 3 мм. Текстурата е погодна за сечење, флексибилна, пластична, со путерно жолта боја, а пресекот е мазен и сјаен.^[1] Сирењето има благ, сладок, малку кисел вкус и мирис. Трапистот може да има апсолутна содржина на вода од околу 48 проценти во масната супстанција, од 55 до 58 проценти вода во немасната супстанција и 1,6 до 2,5 проценти сол.^[2] Времето на зреење е од 5 до 12 недели.

Историја

Трапист потекнува од Франција (трапистскиот манастир на Пор ди Сали), од каде што е донесен во Средна Европа од трапистските монаси.^[3]

Производство

Технологијата за правење трапист е изведена од онаа на сирењето Пор ди Сали, но изворниот рецепт не ѝ е познат на јавноста. Трапист се прави во неколку верзии, кои се разликуваат по текстурата на тестото (полутврдо или тврдо сирење за сечење), по обликот и распоредот на окцата (заоблени окца или ретки пукнатини, ретко посеани окца), кората е малку сува или има засушена црвена паста, може да се парафинира . Денеска сирењето трапист, според традиционалниот рецепт, се произведува во манастири од редот во Франција и Белгија, на некои места во САД и во Бања Лука во Босна и Херцеговина.