Тресет

Тресет — темнокафеава маса од делумно распаднати растенија образувана во мочурливи услови. Се користи како гориво и ѓубриво.^[1][2] Тресетиштата претставуваат главен извор на тресет; иако поретки, и други влажни подрачја — како што се низински мочуришта, покосини и тропски тресетни шуми — исто така создаваат наслаги од тресет. Пределите покриени со тресет се дом на конкретни видови растенија, меѓу кои сфагнумски мов, вресовесни грмушки и острики. Поради тоа што органската материја се таложи со илјадници години, тресетните наноси претставуваат вредни записи за некогашната растителност и клима, зачувувајќи растителни остатоци како полен. Ова овозможува реконструкција на минатите средини и проучување на промените во користењето на земјиштето^[3]

Средноразложен тресетен хоризонт на тревно-подзолична почва со застојана подземна вода

Тресетна земја

Од високиот, а поретко и од нискиот разложен тресет, се добиваат тресетна земја и тресетен хумус, кои се користат во градинарството и украсното цвеќарство.^[4]

Тресетот ја подобрува плодноста на земјата. За употреба како состојка во почвени мешавини за собни и стакленички растенија, тресетните грутки се сушат на воздух во ниски и широки купчиња три години, бидејќи во свежо ископаниот тресет се содржат штетни материи (особено киселини) за повеќето растенија. За побрзо сушење и исфрлање на киселините, се врши редовно превртување на тресетот. Почвените мешавини засновани на тресет се одликуваат со голема способност за задржување на влага. Во комбинација со песок, тресетната земја се користи за сеење на ситни семиња и како основна компонента при подготовка на почвени мешавини за многу растенија во затворени услови (заштитен простор).