Црква „Св. Ѓорѓи“ - Вашарејца

Свети Ѓорѓи — главна селска црква во селото Вашарејца.^[1] Црквата е сместена на рид над селото и железничката пруга.^[2]

Свети Ѓорѓи
Поглед на црквата
македонска православна црква
Епархија	Преспанско-пелагониска
Архијерејско намесништво	Битолско
Парохија	Беранечка
Местоположба
Координати	41°10′29.5″N 21°24′11.2″E
Место	Вашарејца
Општина	Могила
Држава	Македонија
Општи податоци
Покровител	Свети Георги
Изградба	1862
Завршено	1883
Архитектонски опис

Историја

Изградбата на црквата започнала во 1862 година, а истата завршила во 1883 година, во време кога началници во селото биле Ристе, Божин, Богдан, Илија и Георги Власак од родот Власковци; како и Петко, Трпче, Стојан, Коле и Ангел. Се претпоставува дека на 300 метри од црквата имало латински манастир. На тоа место се пронајдени мермерни камења, од кои некои се пренесени во црквата и денес стојат на самата нејзина врата. Тоа место кое сега е утрина (пасиште) и е наречено Манастириште.^[2]

Архитектура

Градбата на црквата има правоаголна основа со украсена многуаголна апсида на источната страна. Влезот на црквата се наоѓа на јужната страна и над него има ниша со фреска на која е прикажан Свети Георги. Објектот е изграден од камен и е варосан, а во целост е покриен со кров од ќерамиди. Кон западната страна на црквата е дограден помошен објект. Дворот на црквата е ограден со метална ограда и во него се сместени камбанаријата, базен за верски обреди, железен крст и селските гробишта. Камбанаријата се издига на бетонски темел со квадратна основа и претставува отворена метална конструкција, заградена со ниска метална ограда во долниот дел и покриена со лимен пирамидален кров. Железниот крст се наоѓа на самиот врв на ридот на кој е сместена црквата и истиот е висок околу 15 м.^[2] Крстот бил осветен на 24 јули 2016 година.

Живопис

Внатрешноста на црквата е целосно живописана со фрескоживопис кој содржи доста ретки и занимливи прикази на четворицата јавачи и апокалипсата, страшниот суд, пеколот и други мотиви од Библијата.^[2]

Галерија

однадвор и помошниот објект

• 
  Дворот на црквата
• 
  Влезот на црквата
• 
  Апсидата
• 
  Помошниот објект

Внатрешноста на црквата

• 
  Фреска со четворицата јавачи и апокалипсата
• 
  Натпис со податоци за изградбата
• 
  Фреска со Исус Христос
• 
  Фрескопис на западниот ѕид со натпис за изградбата

Останати објекти во дворот

• 
  Камбанаријата
• 
  Железниот крст
• 
  Базенот за верски обреди
• 
  Селските гробишта

Поврзано

• Вашарејца
• Преспанско-пелагониска епархија
• Битолско архијерејско намесништво
• Беранечка парохија