![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/0/0a/Skin_Microbiome20169-300.jpg/640px-Skin_Microbiome20169-300.jpg&w=640&q=50)
മനുഷ്യരിലെ സൂക്ഷ്മജീവികൾ
From Wikipedia, the free encyclopedia
മനുഷ്യ ശരീരത്തിൽ ജീവിക്കുന്ന സൂക്ഷ്മജീവികളാണ് ഹ്യൂമൻ മൈക്രോബയോട്ട എന്നുവിളിക്കപ്പെടുന്നത്. ശരീരദ്രവങ്ങളിലോ ശരീരകലകളിലോ ഇവ കാണപ്പെടുന്നു. ത്വക്ക്, സ്തനഗ്രന്ഥികൾ, പ്ലാസന്റ, ശുക്ളം, ഗർഭാശയം, അണ്ഡാശയത്തിലെ ഫോളിക്കിളുകൾ, ശ്വാസകോശം, ഉമിനീര്, വായ്ക്കുള്ളിലെ ശ്ലേഷ്മസ്തരം, കൺജങ്റ്റൈവ അഥവാ നേത്രാവരണം, ദഹനവ്യൂഹം എന്നിവിടങ്ങളിലാണ് ഇത്തരം സൂക്ഷ്മജീവികൾ വസിക്കുന്നത്. ബാക്ടീരിയ, ആർക്കിയ, ഫംഗസ്, പ്രോട്ടിസ്റ്റ, വൈറസ് എന്നീ വിഭാഗങ്ങളിൽ ഇവ ഉൾപ്പെടുന്നു. ശരീരത്തിനുപുറത്ത് വസിക്കുന്ന സൂക്ഷ്മജീവികളെ ഈ നിർവചനത്തിൽ ഉൾപ്പെടുത്തിയിട്ടില്ല.
![Thumb image](http://upload.wikimedia.org/wikipedia/commons/thumb/0/0a/Skin_Microbiome20169-300.jpg/640px-Skin_Microbiome20169-300.jpg)
മനുഷ്യശരീരത്തിലെ കോശങ്ങളും സൂക്ഷ്മജീവികളും തമ്മിലുള്ള അനുപാതം പുതിയ നിഗമനങ്ങൾ അനുസരിച്ച് 1 : 3 ആണ്. മുമ്പ് ഇത് 1: 10 ആയിരുന്നു. മനുഷ്യശരീരവുമായി ചേർന്ന് താമസിക്കുന്ന ചില സൂക്ഷ്മജീവികൾ കമെൻസലുകൾ എന്നറിയപ്പെടുന്നു. ഇവ മനുഷ്യശരീരത്തിന് യാതൊരുതരത്തിലുമുള്ള ദോഷഫലങ്ങൾ ഉണ്ടാക്കില്ല. മറ്റുചിലവ മനുഷ്യശരീരവുമായി യോജിച്ച് പോകുന്നവയും മ്വൂച്വലിസം എന്ന ബന്ധത്തിലൂടെ ഇരുവർക്കും ഗുണകരമാകുന്ന തരത്തിൽ വസിക്കുന്നവയുമാണ്. എന്നാൽ രോഗകാരികളല്ലാത്ത ചില സൂക്ഷ്മജീവികൾ അവ ഉത്പാദിപ്പിക്കുന്ന ചില രാസവസ്തുക്കളാൽ മനുഷ്യശരീരത്തിന് ചില ദോഷഫലങ്ങളുണ്ടാക്കുന്നു. ശരീരത്തിന് ദോഷഫലങ്ങളുണ്ടാക്കാത്ത സൂക്ഷ്മജീവികളെ പൊതുവെ നോർമൽ മൈക്രോബയോട്ട അഥവാ നോർമൽ ഫ്ലോറ എന്നുവിളിക്കുന്നു.
1880 കളുടെ മധ്യത്തിലാണ് മനുഷ്യശരീരത്തിൽ വസിക്കുന്ന ഈ. കോളൈ ബാക്ടീരിയയെ ആസ്ട്രിയൻ പീഡിയാട്രീഷ്യനായ തിയോഡോർ എസ്ചെറിഷ് കണ്ടെത്തുന്നത്. 2007 നുശേഷം ഹ്യൂമൻ മൈക്രോബയോം പ്രോജക്ടിലൂടെയാണ് മനുഷ്യശരീരത്തിലെ സൂക്ഷ്മജീവികളെക്കുറിച്ചുള്ള വ്യക്തമായ ധാരണ ലഭ്യമായത്. 2018 ജൂൺ 27 മൈക്രോബയോം ദിനമായി ആചരിക്കുന്നു.[1]
മനുഷ്യശരീരത്തിൽ വസിക്കുന്ന സൂക്ഷ്മജീവികളുടെ ജീനോം സീക്വൻസിങ്ങിന്ഹ്യൂമൻ മൈക്രോബയോം പ്രോജക്ട് എന്നുവിളിക്കുന്നു. ത്വക്ക്, വായ്, മൂക്ക്, ദഹനവ്യൂഹം, യോനി എന്നിവിടങ്ങളിലെ സൂക്ഷ്മജീവികളുടെ ഡി.എൻ.എ കളിലെ ജീനുകളെ തിരിച്ചറിയുന്നതിനുള്ള പദ്ധതിയാണിത്. പദ്ധതിയുടെ പ്രാരംഭഫലങ്ങൾ 2012 ൽ പുറത്തുവന്നു.