അപ്പോളോണിയസ്

ഒരു പ്രാചീന ഗ്രീക്ക് ഗണിതശാസ്ത്രജ്ഞനാണ് ‍അപ്പോളോണിയസ്. അലക്സാൻഡ്രിയയിലെ യൂക്ളിഡ്, ആർക്കിമിഡീസ് എന്നീ ശാസ്ത്രജ്ഞൻമാരെപ്പോലെ അപ്പോളോണിയസും ഗണിതശാസ്ത്രത്തിനു മികച്ച സംഭാവനകൾ നല്കിയിട്ടുണ്ട്. എട്ട് ഭാഗങ്ങളായി ഇദ്ദേഹം രചിച്ച കോണിക് സെക്ഷൻസ് (Conic Sections) എന്ന ഗണിതശാസ്ത്രഗ്രന്ഥം 1710-ൽ എഡ്മണ്ട് ഹാലി എന്ന ശാസ്ത്രജ്ഞൻ പ്രസിദ്ധീകരിക്കുകയുണ്ടായി. മഹാനായ ഗണിതശാസ്ത്രജ്ഞൻ എന്ന ബഹുമതി അപ്പോളോണിയസിനു നേടിക്കൊടുത്തത് ഈ ഗ്രന്ഥമാണ്. യൂക്ളിഡിന്റേയും മെനെക്മസ്സിന്റേയും ഗ്രന്ഥങ്ങളെക്കാൾ പ്രചാരം, ഏകദേശം 2,000 വർഷങ്ങളോളം ഈ കൃതിക്കുണ്ടായിരുന്നു. ഇദ്ദേഹത്തിന്റെ കാലശേഷമാണ് മറ്റൊരു ഗ്രന്ഥമായ ഡിറ്റർമിനേറ്റ് സെക്ഷൻ (Determinate Section) ആർ.സൈമൺ എന്ന ശാസ്ത്രജ്ഞൻ പ്രസിദ്ധീകരിച്ചത്. അലക്സാൻഡ്രിയയിലും പെർഗാമിലുമായിരുന്നു ജീവിതകാലം ഏറിയകൂറും കഴിച്ചിരുന്നത് എന്നതൊഴിച്ചാൽ അപ്പോളോണിയസിന്റെ മറ്റു ജീവചരിത്രവിവരങ്ങൾ ഒന്നും ലഭ്യമല്ല.

Types of conic sections

കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ അപ്പോളോണിയസ് എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം.

യവനശില്പിയായിരുന്ന അപ്പോളോണിയസിനെക്കുറിച്ചറിയാൻ, ദയവായി അപ്പോളോണിയസ് (ട്രാലസ്) കാണുക.