കുട്ടി

ജനനം മുതൽ കൗമാരമാകും വരെയുള്ള മനുഷ്യശിശുവിനെയാണ് കുട്ടി എന്നതുകൊണ്ട് ഉദ്യേശിക്കുന്നത്. ഈ കാലയളവിൽ ശാരീരികവും മാനസികവും സാമൂഹികവുമായ ഒട്ടേറെ വളർച്ചാ മാറ്റങ്ങൾ സംഭവിക്കുന്നു. കുട്ടികളുടെ അവകാശങ്ങളെയും സംരക്ഷണത്തെയും സംബന്ധിച്ച് പല രാജ്യങ്ങളും പ്രത്യേക നിയമങ്ങളും വ്യവസ്ഥകളും കൊണ്ടുവന്നിട്ടുണ്ട്.^[1]

കുട്ടി

=== കുട്ടികളുടെ വളർച്ചാ ഘട്ടങ്ങൾ ===

ശിശു (Infant): ജനനം മുതൽ ഒരു വയസ്സു വരെയുള്ള കാലഘട്ടമാണിത്. ഈ ഘട്ടത്തിൽ കുഞ്ഞ് ചുറ്റുപാടുകളോട് പ്രതികരിക്കാൻ തുടങ്ങുന്നു. മുലയൂട്ടൽ, ഉറക്കം, സ്പർശം എന്നിവയിലൂടെയാണ് പ്രധാനമായും ലോകത്തെ മനസ്സിലാക്കുന്നത്.^[2]

ചെറിയ കുട്ടി (Toddler): ഒന്ന് മുതൽ മൂന്ന് വയസ്സു വരെയുള്ള കാലഘട്ടമാണിത്. ഈ സമയത്താണ് കുട്ടി നടക്കാനും സംസാരിക്കാനും തുടങ്ങുന്നത്. ചുറ്റുമുള്ള കാര്യങ്ങൾ സ്വയം പര്യവേക്ഷണം ചെയ്യാനുള്ള താല്പര്യം ഈ ഘട്ടത്തിൽ വർദ്ധിക്കുന്നു.^[3]

പ്രീ-സ്കൂൾ പ്രായം: മൂന്നു മുതൽ അഞ്ച് വയസ്സു വരെയുള്ള കാലഘട്ടമാണിത്. കളികളിലൂടെയും സാമൂഹിക ഇടപെടലുകളിലൂടെയും പഠനം നടക്കുന്ന ഒരു ഘട്ടമാണിത്. ചോദ്യങ്ങൾ ചോദിച്ചും പുതിയ കാര്യങ്ങൾ കണ്ടുപിടിച്ചും അവർ ലോകത്തെക്കുറിച്ച് കൂടുതൽ മനസ്സിലാക്കുന്നു.^[4]

സ്കൂൾ പ്രായം: ആറു മുതൽ പന്ത്രണ്ട് വയസ്സു വരെയുള്ള കുട്ടികളാണ് ഈ വിഭാഗത്തിൽ വരുന്നത്. ഈ ഘട്ടത്തിൽ അവർക്ക് പുതിയ കാര്യങ്ങൾ വേഗത്തിൽ പഠിക്കാനും സുഹൃദ്ബന്ധങ്ങൾ സ്ഥാപിക്കാനും കഴിയും. അവരുടെ താല്പര്യങ്ങളും വ്യക്തിത്വവും രൂപപ്പെടാൻ തുടങ്ങുന്നത് ഈ ഘട്ടത്തിലാണ്.^[5]

കൗമാരം (Adolescence): ഏകദേശം 12 വയസ്സു മുതൽ 18 വയസ്സു വരെയുള്ള കാലഘട്ടമാണിത്. ശാരീരികമായി പ്രായപൂർത്തിയാകുന്നതിനൊപ്പം മാനസികമായും വൈകാരികമായും വലിയ മാറ്റങ്ങൾ സംഭവിക്കുന്ന സമയമാണിത്. ഈ ഘട്ടത്തിൽ സ്വയം വ്യക്തിത്വം കണ്ടെത്താനുള്ള ശ്രമങ്ങളും, ഭാവി ലക്ഷ്യങ്ങളെക്കുറിച്ചുള്ള ചിന്തകളും ശക്തമാകും.^[6]